പോര്‍ച്ചുഗീസ് സൂപ്പര്‍താരം ക്രിസ്റ്റ്യാനോ റൊണാള്‍ഡോ മാഞ്ചസ്റ്റര്‍ യുണൈറ്റഡ് വിടാനൊരുങ്ങുന്നതായി റിപ്പോർട്ടുകൾ. ട്രാൻസ്ഫർ വിപണിയിൽ പോലും താൽപര്യം കാണിക്കാത്ത ക്ലബിന്, അടുത്ത സീസണില്‍ പ്രീമിയര്‍ ലീഗ് കിരീടം നേടാനാകുമെന്ന് കരുതുന്നില്ലെന്നാണ് താരത്തിന്റെ അഭിപ്രായം. ചാമ്പ്യന്‍സ് ലീഗില്‍ കളിക്കാന്‍ ആഗ്രഹിക്കുന്നതായി വെളിപ്പെടുത്തിയ താരം, തീരുമാനം ക്ലബിനെ അറിയിച്ചതായും റിപ്പോർട്ടുകൾ പറയുന്നു.
ലീഗ് കിരീടം നേടുന്നതിനുള്ള ആഗ്രഹം പോലും ക്ലബിനില്ലെന്ന ചിന്തയിലാണ് റൊണാൾഡോ, ക്ലബ് വിടാനൊരുങ്ങുന്നത്.
കഴിഞ്ഞ സീസണിലെ ലീഗിൽ തിളങ്ങാൻ മാഞ്ചസ്റ്റര്‍ യുണൈറ്റഡിന് കഴിഞ്ഞിരുന്നില്ല. ക്ലബ് ചരിത്രത്തിലെ തന്നെ ഏറ്റവും മോശം പ്രകടനത്തിനൊടുവിൽ, ആറാം സ്ഥാനത്താണ് ടീം ഫിനിഷ് ചെയ്തത്. അതേസമയം, ക്ലബിലേക്ക് തിരിച്ചെത്തിയ റൊണാള്‍ഡോ 38 കളികളില്‍നിന്ന് 24 ഗോള്‍ നേടി ടീമിന്റെ ടോപ്പ് സ്‌കോററായി. അടുത്ത സീസണിലേക്ക്, പരിശീലകന്‍ എറിക് ടെന്‍ ഹാഗ് മികച്ച സൈനിംഗുകൾ നടത്തുമെന്ന് താരം പ്രതീക്ഷിച്ചിരുന്നെങ്കിലും ഒന്നുമുണ്ടായില്ല. ട്രാൻസ്ഫർ വിപണിയിൽ പോലും ക്ലബ് മതിയായ താൽപര്യം കാണിക്കുന്നില്ല. ലീഗ് കിരീടം നേടുന്നതിനുള്ള ആഗ്രഹം പോലും ക്ലബിനില്ലെന്ന ചിന്തയിലാണ് റൊണാൾഡോ, ക്ലബ് വിടാനൊരുങ്ങുന്നത്.
നിലവിൽ മറ്റു ക്ലബുകളുമായൊന്നും താരം കരാർ ഒപ്പിട്ടിട്ടില്ല. എന്നാൽ റോമ, ചെൽസി, ബയേൺ മ്യൂണിക്ക് ഉൾപ്പെടെ ക്ലബുകൾ റൊണാൾഡോയ്ക്കായി രംഗത്തെത്തിയിട്ടുണ്ടെന്നാണ് റിപ്പോർട്ടുകൾ. താരത്തിന്റെ മാനേജര്‍ ജോര്‍ജ് മെന്‍ഡിസാണ് ചർച്ചകൾ നടത്തുന്നത്.
റൊണാള്‍ഡോയുടെ നഷ്ടം യുണൈറ്റഡിന് കനത്ത തിരിച്ചടിയായിരിക്കും. ടീമിന്റെ നെടുംതൂണായ താരം കഴിഞ്ഞ സീസണില്‍ ക്ലബ്ബിലെ മറ്റേതൊരു കളിക്കാരനേക്കാളും 14 ഗോളുകള്‍ കൂടുതല്‍ നേടിയിരുന്നു. അതേസമയം, നെതര്‍ലന്‍ഡ്സിന്റെ ലെഫ്റ്റ് ബാക്ക് ടൈറല്‍ മലേഷ്യയെ 15 മില്യണ്‍ യൂറോയ്ക്ക് സ്വന്തമാക്കാന്‍ യുണൈറ്റഡ് ശ്രമിക്കുന്നുണ്ട്. ടൈറലിനൊടൊപ്പം ലിസാന്‍ഡോ മാര്‍ട്ടിനെസിനെയും ടീമിലെത്തിക്കാനും ശ്രമമുണ്ട്.