ഐഎസ്എൽ ഫുട്ബോളിൽ തോൽവി തുടർക്കഥയാക്കി നോർത്ത് ഈസ്റ്റ് യുണൈറ്റഡ് എഫ്‌സി. ഞായറാഴ്ച നടന്ന മത്സരത്തിൽ ഒരു ഗോളിന് ജംഷഡ്‌പൂർ എഫ്‌സിയാണ് അവരെ പരാജയപ്പെടുത്തിയത്. നായകൻ പീറ്റർ ഹാർട്ട്ലിയുടെ വകയായിരുന്നു ജംഷഡ്‌പൂരിന്റെ ഗോൾ. സീസണിലെ ജംഷഡ്‌പൂരിന്റെ ആദ്യ ജയമാണിത്.
ഈ സീസണിൽ ഇതുവരെ ജയം കണ്ടെത്താൻ സാധിക്കാത്ത രണ്ട് ടീമുകളുടെ പോരാട്ടമാണ് ഇന്ന് ജംഷഡ്‌പൂർ മൈതാനത്ത് നടന്നത്. നോർത്ത് ഈസ്റ്റ് പ്രതിരോധത്തിൽ അഞ്ച് താരങ്ങളെ ഇറക്കി 5-3-2ൽ കളി ആരംഭിച്ചപ്പോൾ ജംഷഡ്‌പൂർ പരമ്പരാഗത ഫോർമേഷനായ 4-4-2 ലാണ് ഇറങ്ങിയത്. തുടക്കം മുതൽ ആക്രമിച്ച് കളിച്ച ജംഷഡ്‌പൂർ നിരന്തരം നോർത്ത് ഈസ്റ്റ് ഗോൾ മുഖത്ത് പ്രശ്നങ്ങൾ സൃഷ്ട്ടിച്ചു. ഗോൾ വലയ്ക്ക് മുന്നിൽ മലയാളി ഗോൾ കീപ്പർ മിർഷാദിന്റെ പ്രകടനമാണ് പലപ്പോഴും അവർക്ക് വിനയായത്. മുപ്പതോയൊന്നാം മിനുട്ടിൽ ലഭിച്ച കോർണറിൽ നിന്നായിരുന്നു ജംഷഡ്‌പൂരിന്റെ ഗോൾ. വെല്ലിംഗ്ടൺ പ്രിയോറി എടുത്ത കിക്കിൽ ഹാരി സോയറിന്റെ പാസ്സിലാണ് ഹാർട്ട്ലി സ്കോർ ചെയ്തത്.
രണ്ടാം പകുതിയിൽ തിരിച്ച് വരാൻ നോർത്ത് ഈസ്റ്റ് ശ്രമിച്ചെങ്കിലും ഗോൾ അകന്ന് നിന്നതോടെ അവർക്ക് നിരാശയായി ഫലം. ആദ്യ പകുതിയിൽ നിന്ന് വ്യതസ്തമായി കൂടുതൽ ആകാറാമാനാണ് തുറന്നെടുക്കാൻ അവർക്ക് സാധിച്ചിരുന്നു. എന്നാൽ പീറ്റർ ഹാർട്ട്ലിയുടെ നേതൃത്വത്തിലുള്ള പ്രതിരോധം അവരെ തടഞ്ഞു. നാല് പോയിന്റോടെ പോയിന്റ് പട്ടികയിൽ ജംഷഡ്‌പൂർ ആറാം സ്ഥാനത്തേക്ക് കയറിയപ്പോൾ കളിച്ച നാലിലും തോറ്റ നോർത്ത് ഈസ്റ്റ് യുണൈറ്റഡ് അവസാനസ്ഥാനത്താണ്.