കേരളാ ബ്ലാസ്‌റ്റേഴ്‌സ് മുന്‍ നായകന്‍ ജസല്‍ കര്‍നെയ്‌റോയുമായി കരാറിലെത്തി ബംഗളുരു എഫ്.സി. ഇന്നലെയാണ് താരവുമായി രണ്ടു വര്‍ഷത്തെ കരാര്‍ ഒപ്പുവച്ചതാണ് ബംഗളുരു എഫ്.സി. ഔദ്യോഗികമായി അറിയിച്ചത്. ഇക്കഴിഞ്ഞ ഐ.എസ്.എല്‍. സീസണിന്റെ അവസാനത്തോടെയാണ് ജെസല്‍ ബ്ലാസ്‌റ്റേഴ്‌സ് വിടാന്‍ തീരുമാനിച്ചത്.
ഇന്നലെ സമാപിച്ച എ.ഐ.എഫ്.എഫ്. സൂപ്പര്‍ കപ്പ് ഫുട്‌ബോള്‍ ചാമ്പ്യന്‍ഷിപ്പില്‍ പങ്കെടുത്ത ബ്ലാസ്‌റ്റേഴ്‌സ് ടീമിലും ജെസല്‍ കളിച്ചിരുന്നില്ല. പരുക്കിനെത്തുടര്‍ന്നാണ് താരത്തെ ടീമില്‍ നിന്നൊഴിവാക്കിയതെന്നായിരുന്നു ബ്ലാസ്‌റ്റേഴ്‌സ് മാനേജ്‌മെന്റ് അറിയിച്ചിരുന്നത്.
32-കാരനായ ജെസല്‍ 2019-ലാണ് കേരളാ ബ്ലാസ്‌റ്റേഴ്‌സില്‍ എത്തിയത്. മൂന്നു സീസണുകളിലായി 63 മത്സരങ്ങളില്‍ ബ്ലാസ്‌റ്റേഴ്‌സിനു വേണ്ടി ബൂട്ടുകെട്ടിയ താരം ടീമിന്റെ വിശ്വസ്ത പ്രതിരോധഭടനായിരുന്നു. ഇക്കഴിഞ്ഞ ഐ.എസ്.എല്‍. സീസണില്‍ 19 മത്സരങ്ങളില്‍ ജെസല്‍ ബ്ലാസ്‌റ്റേഴ്‌സ് ജഴ്‌സി അണിഞ്ഞിരുന്നു.
ബ്ലാസ്‌റ്റേഴ്‌സിനായി ജെസലിന്റെ അവസാന മത്സരം ബംഗളുരു എഫ്.സിക്കെതിരേയായിരുന്നുവെന്നതും യാദൃശ്ചികമായി. ഐ.എസ്.എല്‍. 2022-23 സീസണിലെ പ്ലേ ഓഫ് എലിമിനേറ്റര്‍ മത്സരത്തില്‍ ബംഗളുരുവിനോടു തോറ്റാണ് ബ്ലാസ്‌റ്റേഴ്‌സ് പുറത്തായത്. മത്സരത്തില്‍ 76 മിനിറ്റ് നേരം ബ്ലാസ്‌റ്റേഴ്‌സിനായി ജെസല്‍ കളിച്ചിരുന്നു.
ബംഗളുരു എഫ്.സി. പരിശീലകന്‍ സൈമണ്‍ ഗ്രേയ്‌സന്റെ പ്രത്യേക താല്‍പര്യപ്രകാരമാണ് ജെസലിനെ ടീം സ്വന്തമാക്കിയതെന്നു റിപ്പോര്‍ട്ടുകള്‍ സൂചിപ്പിക്കുന്നു. നിലവില്‍ രണ്ടുവര്‍ഷത്തെ കരാറാണ് താരവുമായി ഒപ്പുവച്ചിരിക്കുന്നതെങ്കിലും അതു ദീര്‍ഘിപ്പിക്കാനുള്ള വകുപ്പുകളും കരാറില്‍ ഉള്‍ക്കൊള്ളിച്ചിട്ടുണ്ടെന്നാണ് ലഭിക്കുന്ന വിവരം.
സീസണ്‍ അവസാനത്തോടെ ബ്ലാസ്‌റ്റേഴ്‌സില്‍ കൊഴിഞ്ഞുപോക്ക് തുടരുകയാണ്. ങെസലിനു പുറമേ ഇന്ത്യന്‍ താരങ്ങളായ ഹര്‍മന്‍ജ്യോത് ഖാബ്ര, നിഷുകുമാര്‍ എന്നിവരും ടീം വിടുമെന്ന ശ്രുതിയുണ്ട്.