36-ാമത് ദേശീയ ഗെയിംസിന്റെ പുരുഷ വിഭാഗം ഫൈനലില്‍ കടന്നു കേരളാ ടീം. ഇന്നു നടന്ന സെമിഫൈനലില്‍ ശക്തരായ കര്‍ണാടകയെ ഏകപക്ഷീയമായ രണ്ടു ഗോളുകള്‍ക്കു തോല്‍പിച്ചായിരുന്നു കേരളത്തിന്റെ ഫൈനല്‍ പ്രവേശനം.
ആഷിഖ്, വിഷ്ണു എന്നിവരാണ് കേരളത്തിനായി സ്‌കോര്‍ ചെയ്തത്. 11-ന് നടക്കുന്ന ഫൈനലില്‍ ബംഗാള്‍-സര്‍വീസസ് മത്സരത്തിലെ വിജയികളെയാണ് കേരളം എതിരിടുക. കേരള-ബംഗാള്‍ സ്വപ്‌ന ഫൈനലിനാണ് ആരാധകര്‍ കാത്തിരിക്കുന്നത്.
കാല്‍നൂറ്റാണ്ടിനു ശേഷം ദേശീയ ഗെയിംസ് ഫുട്‌ബോള്‍ സ്വര്‍ണമാണ് കേരളം ലക്ഷ്യം വയ്ക്കുന്നത്. ഇതിനു മുമ്പ് 1997-ല്‍ ബെംഗളുരുവില്‍ വച്ചു നടന്ന ദേശീയ ഗെയിംസിലാണ് കേരളം അവസാനമായി സ്വര്‍ണമണിഞ്ഞത്.