ഫ്രഞ്ച് ക്ലബ്ബ് പാരീസ് സെന്റ് ജർമന്റെ (പിഎസ്‌ജി) സൂപ്പർ താരം കിലിയന്‍ എംബാപെ കൂടുമാറ്റത്തില്‍ തീരുമാനം ഉടന്‍. താരം റയല്‍ മാഡ്രിഡിലേക്ക് എത്തുമെന്ന് ദീർഘനാളായി അഭ്യൂഹം നിലനില്‍ക്കുന്നുണ്ട്. എന്നാല്‍ മറ്റൊരു ക്ലബ്ബുകൂടി സാധ്യത പട്ടികയിലിടം നേടിയതായും അടുത്ത വാരങ്ങളില്‍ തന്നെ താരം തീരുമാനമെടുത്തേക്കുമെന്നും ഇഎസ്‌പിഎന്‍ റിപ്പോർട്ട് ചെയ്തു.
റയലിന് പുറമെ ലിവർപൂളാണ് എംബാപെ പരിഗണിക്കുന്ന രണ്ടാമത്തെ ക്ലബ്ബ്. ജൂണില്‍ എംബാപെയുടെ പിഎസ്‌ജിയുമായുള്ള കരാർ അവസാനിക്കും. പിഎസ്‌ജി താരവുമായുള്ള കരാർ പുതുക്കിയേക്കില്ല.
ലിവർപൂളൊരു ഓപ്ഷനായി നിലനില്‍ക്കുന്നുണ്ടെങ്കിലും റയല്‍ തന്നെയാണ് എംബാപെക്കായുള്ള ഓട്ടത്തില്‍ മുന്നില്‍. ഇതിനോടകം തന്നെ പലതവണ എംബാപെയെ സ്വന്തമാക്കാനുള്ള ശ്രമങ്ങള്‍ റയല്‍ നടത്തിയിട്ടുണ്ട്. എംബാപെ റയലുമായി കരാറിലെത്തിയെന്ന വാർത്തകള്‍ ഫ്രഞ്ച് മാധ്യമങ്ങള്‍ റിപ്പോർട്ട് ചെയ്തിട്ടുണ്ട്. എന്നാല്‍ ഇക്കാര്യത്തില്‍ ഇരുഭാഗങ്ങളുടേയും ഔദ്യോഗിക സ്ഥിരീകരണമുണ്ടായിട്ടില്ല.
എന്നാല്‍ ലിവർപൂളിനോട് എംബാപെക്ക് പ്രത്യേക താത്പര്യമുണ്ടെന്നാണ് അടുത്ത വൃത്തങ്ങളെ ഉദ്ധരിച്ച് ഇഎസ്‌പിഎന്‍ റിപ്പോർട്ട് ചെയ്യുന്നത്. ടീമിനെ മാത്രമല്ല പരിശീലകന്‍ ക്ലോപ്പിനെയും എംബാപെ ആരാധിക്കുന്നുണ്ടെന്നും റിപ്പോർട്ട് പറയുന്നു. എന്നാല്‍ ലിവർപൂളിന് എംബാപെയുടെ പ്രതിവാര വേതനം താങ്ങാന്‍ കഴിഞ്ഞേക്കില്ല. 7.12 ലക്ഷം അമേരിക്കന്‍ ഡോളറാണ് താരത്തിന്റെ പ്രതിവാര വേതനം.
ക്ലബ്ബിന്റെ എക്കാലത്തെയും മികച്ച ഗോള്‍ സ്കോററായ എംബാപെയെ നിലനിർത്താന്‍ പിഎസ്‌ജിയും ആഗ്രഹിക്കുന്നതായി റിപ്പോർട്ടുകളുണ്ട്.