ഐ ലീഗ് ഫുട്ബോളിൽ ഗോകുലം കേരള എഫ്‌സിക്ക് തോൽവി. ഇംഫാലിൽ നടന്ന മത്സരത്തിൽ ഒന്നിനെതിരെ രണ്ട് ഗോളുകൾക്ക് നെറോക്ക എഫ്‌സിയാണ് ഗോകുലം കേരളയെ തോൽപ്പിച്ചത്. സ്വീഡൻ ഫെർണാണ്ടസ്, മിർജലോൽ കോസിമോവ് എന്നിവർ നെറോക്കയ്ക്കായി ഗോൾ നേടിയപ്പോൾ, ഗോകുലത്തിന്റെ ഗോൾ നായകൻ അമീനൗ ബൗബ നേടി.
തുടർ ജയങ്ങളുടെ ആത്മവിശ്വാസത്തിലിറങ്ങിയ ഗോകുലത്തെ പതിനൊന്നാം മിനിറ്റിൽ തന്നെ നെറോക്ക ഞെട്ടിച്ചു. കാമോ സ്റ്റെഫാൻ ബായിയുടെ കട്ട് ബാക് സ്വീകരിച്ച സ്വീഡൻ ഫെർണാണ്ടസ് ഗോകുലം ഗോളി ഷിബിൻരാജിനെ കീഴ്‌പ്പെടുത്തി പന്ത് വലയിലാക്കി. ഇടവേളയ്ക്ക് പിരിയും മുൻപ് ഗോൾ മടക്കാൻ ഗോകുലം ശ്രമിച്ചെങ്കിലും നെറോക്ക പ്രതിരോധം പതറാതെ ഉറച്ച് നിന്നു. രണ്ടാം പകുതിയിലും സുന്ദര നിമിഷങ്ങൾ തുറന്നെടുക്കാൻ വടക്ക് കിഴക്കൻ ടീമിന് സാധിച്ചു. 60ാം മിനുറ്റിൽ കോസിമോവ് എടുത്ത ഫ്രീകിക്ക് തട്ടി ഷിബിൻ രാജ് തെറിപ്പിച്ചതിന് പിന്നാലെ മൂന്ന് മിനിറ്റുകൾക്ക് ശേഷം മനോഹരമായ ഒരു കോണറിലൂടെ കോസിമോവ് വലകുലുക്കി. 77ാം മിനുറ്റിൽ നായകൻ നേടിയ ഗോളിലൂടെ മത്സരത്തിലേക്ക് തിരിച്ചുവരാൻ ഗോകുലം ശ്രമിച്ചെങ്കിലും മത്സരം നെറോക്ക സ്വന്തമാക്കി.
14 മത്സരങ്ങളിൽ നിന്ന് 24 പോയിന്റുമായി മൂന്നാം സ്ഥാനത്താണ് ഗോകുലം കേരള. അടുത്ത മത്സരത്തിൽ രണ്ടാംസ്ഥാനത്തുള്ള റൗണ്ട്ഗ്ലാസ് പഞ്ചാബാണ് കേരള ടീമിന്റെ എതിരാളികൾ. ആറ് മത്സരങ്ങളാണ് ഗോകുലത്തിന് ലീഗിൽ അവശേഷിക്കുന്നത്.