ഇന്ത്യന്‍ ഫുട്‌ബോള്‍ ടീമിന്റെ ഔദ്യോഗിക കിറ്റ് സ്പോണ്‍സറായി റിലയന്‍സ് റീട്ടെയിൽ സ്പോര്‍ട്സ് വെയര്‍ ബ്രാന്‍ഡായ പെര്‍ഫോര്‍മാക്സ്. ഓൾ ഇന്ത്യ ഫുട്ബോൾ ഫെഡറേഷനും (എഐഎഫ്എഫ്) പെര്‍ഫോര്‍മാക്സും ഇത് സംബന്ധിച്ച് ധാരണയിലെത്തി. ഇനിമുതൽ പുരുഷ വനിതാ യൂത്ത് ടീമുകളുടെ എല്ലാ ഫോർമാറ്റിലെയും മത്സരങ്ങൾക്ക് ജഴ്‌സി തയ്യാറാക്കുക പെര്‍ഫോര്‍മാക്സ് ആയിരിക്കും.
ഇന്ത്യൻ ഫുട്ബോൾ ടീമുകളുടെ യാത്ര, പരിശീലനങ്ങള്‍ എന്നിവയ്ക്കുള്ള എല്ലാ വസ്ത്രങ്ങളും പെര്‍ഫോര്‍മാക്സാകും ഒരുക്കുക. അതേസമയം പുതിയ പങ്കാളികളായ പെർഫോർമാക്സിനെ ഇന്ത്യൻ ഫുട്ബോൾ കുടുംബത്തിലേക്ക് സ്വാഗതം ചെയ്യുന്നതായി എഐഎഫ്എഫ് സെക്രട്ടറി ജനറൽ ഡോ. ഷാജി പ്രഭാകരൻ പറഞ്ഞു.
സെപ്റ്റംബർ 7 മുതൽ 10 വരെ തായ്‌ലൻഡിൽ വച്ചാണ് കിങ്‌സ് കപ്പ്. 49-ാമത് കിങ്‌സ് കപ്പിൽ ബ്ലൂ ടൈഗേഴ്‌സ് ശ്രദ്ധേയമായ പുതിയ കിറ്റും അവതരിപ്പിക്കും. ഇന്നലെ ഇറാഖിനെതിരായ മത്സരത്തിൽ പുതിയ ജഴ്‌സി അണിഞ്ഞായിരുന്നു ഇന്ത്യ മത്സരത്തിനിറങ്ങിയത്.
എഐഎഫ്‌എഫുമായി ബന്ധം പ്രഖ്യാപിക്കുന്നതിൽ അതിയായ സന്തോഷമുണ്ടെന്ന് പറഞ്ഞ റിലയൻസ് റീട്ടെയിൽ, ഫാഷൻ ലൈഫ്‌സ്റ്റൈൽ പ്രസിഡന്റും സിഇഒയുമായ അഖിലേഷ് പ്രസാദ് ഇന്ത്യയിൽ ഫുട്‌ബോളിന് വലിയ സാധ്യതകളുണ്ടെന്നും വ്യക്തമാക്കി. ഇന്ത്യൻ ഫുട്ബോൾ ടീമുമായുള്ള പങ്കാളിത്തത്തിലൂടെ ഇന്ത്യയില്‍ സ്പോര്‍ട്സ് എല്ലാവര്‍ക്കും പ്രാപ്യമാക്കുക എന്നതാണ് പെര്‍ഫോര്‍മാക്സിന്റെ ലക്ഷ്യമെന്നും അഖിലേഷ് പ്രസാദ് പറഞ്ഞു.