ഇന്ത്യന്‍ പ്രീമിയര്‍ ലീഗിന്റെ പുതിയ സീസണിനു വേണ്ടി രണ്ടും കല്‍പിച്ചുള്ള തയാറെടുപ്പാണ് കേരളാ ബ്ലാസ്റ്റേഴ്സ് നടത്തുന്നതെന്നു സൂചന. ഓസ്ട്രേലിയന് ലീഗില്‍ കളിക്കുന്ന ജോഷ്വാ സൊറ്റീരിയോയെ എത്തിച്ചതിനു പിന്നാലെ ഇന്ത്യന്‍ ഫുട്‌ബോളിലെ മിന്നും താരമായ പ്രബീര്‍ ദാസിനെയും അവര്‍ പാളയത്തിലെത്തിച്ചു.
ചിരവൈരികളായ ബംഗളുരു എഫ്.സിയില്‍ നിന്നാണ് പ്രബീറിനെ ബ്ലാസ്റ്റേഴ്സ് റാഞ്ചിയത്. രണ്ടു വര്‍ഷത്തേക്കാണ് താരവുമായി കരാര്‍ ഒപ്പുവച്ചിരിക്കുന്നത്. ഇക്കഴിഞ്ഞ സീസണില്‍ ബംഗളുരുവിനു വേണ്ടി 20 മത്സരങ്ങള്‍ കളിച്ച താരമാണ് പ്രബീര്‍.
ബംഗളുരുവില്‍ എത്തുന്നതിനു മുമ്പ് എ.ടി.കെ. മോഹന്‍ ബഗാന്റെ താരമായിരുന്നു അദ്ദേഹം. ഇന്ത്യന്‍ സൂപ്പര്‍ ലീഗില്‍ ഇതുവരെ 106 മത്സരങ്ങള്‍ കളിച്ച ബ്രീര്‍ എ.ടി.കെയ്ക്കു പുറമേ, ഡല്‍ഹി ഡൈനാമോസ്, എഫ്.സി. ഗോവ എന്നിവരുടെയും ജഴ്‌സി അണിഞ്ഞിട്ടുണ്ട്.
നേരത്തെ ഓസ്ട്രേലിയന് എ-ലീഗ് ക്ലബായ ന്യൂകാസില്‍ ജെറ്റ്സ് താരം ജോഷ്വയെ ബ്ലാസ്റ്റേഴ്സ് സ്വന്തമാക്കിയിരുന്നു. പുതിയ സീസണിലേക്ക് ബ്ലാസ്‌റ്റേഴ്‌സിന്റെ ആദ്യ സൈനിങ് ആയിരുന്നു ജോഷ്വയുടേത്. ക്ലബ് വിട്ട ഗ്രീക്ക്-ഓസ്ട്രേലിയന് താരം ഗിയാന്നു അപ്പോസ്തലോസിനു പകരക്കാരനായാണ് ഓസ്ട്രേലിയന് വിങ്ങറെ ബ്ലാസ്റ്റേഴ്സ് ടീമില്‍ എത്തിച്ചത്.
എ-ലീഗില്‍ ന്യൂകാസില്‍ ജെറ്റ്സിനു വേണ്ടി 23 മത്സരങ്ങള്‍ കളിച്ച താരം മൂന്നു ഗോളുകളും നാല് അസിസ്റ്റുകളും സ്വന്തമാക്കിയിട്ടുണ്ട്. അതിനു മുമ്പ് വെസ്റ്റേണ്‍ സിഡ്നി വാണ്ടറേഴ്സിനായും വെല്ലിങ്ടണ്‍ ഫീനിക്സിനായും കളിച്ചിട്ടുണ്ട്. വാണ്ടറേഴ്സിനു വേണ്ടി 90 മത്സരങ്ങളില്‍ നിന്ന് 12 ഗോളുകളും രണ്ട് അസിസ്റ്റുകളും ഫീനിക്സിനു വേണ്ടി 66 മത്സരങ്ങളില്‍ നിന്ന് 16 ഗോളുകളും അഞ്ച് അസിസ്റ്റുകളും സ്വന്തമാക്കിയിട്ടുണ്ട്. ഓസ്ട്രേലിയന് അണ്ടര്‍-20, അണ്ടര്‍-23 ടീമുകളുടെയും ഭാഗമായിട്ടുള്ള താരമാണ് ജോഷ്വ.