റാസ് അബു അബൗദ് സ്റ്റേഡിയത്തില്‍ തിങ്ങി നിറങ്ങ ഗ്യാലറിയെ സാക്ഷിയാക്കി റഫറി പെനാല്‍റ്റി വിധിച്ചപ്പോള്‍ പോളണ്ട് ആരാധകര്‍ കിനാവ് കണ്ടു തുടങ്ങിയിരുന്നു. മത്സരം 55ാം മിനുറ്റില്‍. കിക്കെടുക്കാനെത്തുന്നത് ലോകത്തിലെ ഏറ്റവും മികച്ച മുന്നേറ്റ താരത്തിലൊരാള്‍, ടീം നായകന്‍, ഗോളടി യന്ത്രം. പക്ഷേ റോബര്‍ട്ട് ലെവന്‍ഡോവ്സ്‌കിക്ക് കാര്യങ്ങള്‍ എളുപ്പമായിരുന്നില്ല. കാരണം ഗോള്‍ പോസ്റ്റിന് കാവലുണ്ടായിരുന്നത് സാക്ഷാല്‍ മെക്‌സിക്കന്‍ വന്‍മതില്‍ ഒച്ചോവ. ലെവന്‍ഡോവ്സ്‌കിയുടെ കാലില്‍ നിന്നുയര്‍ന്ന പന്ത് ഒച്ചോവ തടുത്തിട്ടപ്പോള്‍ മെക്‌സിക്കന്‍ ആരാധകന്‍ ആരാധകന്‍ മത്സരം വിജയം പോലെ ആഘോഷിച്ചു. അതെ ലെവന്‍ഡോവ്സ്‌കിയെ തടഞ്ഞ് ഒച്ചോവ മെക്‌സിക്കോയ്ക്ക് നേടിക്കൊടുത്തത് വിജയത്തോളം പോന്ന സമനില.
വിരസമായ ആദ്യ പകുതിക്ക് ശേഷം രണ്ടാം പകുതിയിലാണ് മത്സരം ചൂടുപിടിച്ചത്. പന്തടക്കത്തിലും ഷോട്ടുകളിലും മെക്‌സിക്കോ ഏറെ മുന്‍പിലായിരുന്നു. മത്സരഗതിക്ക് വിപരീതമായി ഗോള്‍ കണ്ടെത്താനുള്ള സുവര്‍ണാവസരമാണ് പോളിഷ് നായകന്‍ നഷ്ടമാക്കിയത്. ഇതോടെ എണ്ണം പറഞ്ഞ ഗോള്‍ വേട്ടക്കാരനായിട്ടും ലോകകപ്പിലെ ആദ്യ ഗോളിനായി ലെവന്‍ഡോവ്സ്‌കിക്ക് ഇനിയും കാത്തിരിക്കണം.
ഇരു ടീമുകളും ഓരോ പോയിന്‌റ് വീതം നേടിയതോടെ ഗ്രൂപ്പ് സി യിലെ സാധ്യതകള്‍ ഇപ്പോഴും പ്രവചനാതീതമാണ്. അര്‍ജന്‌റീനയെ തോല്‍പ്പിച്ച സൗദി ഗ്രൂപ്പില്‍ ഒന്നാമത് നില്‍ക്കുമ്പോള്‍ മെസിയും സംഘവുമാണ് അവസാന സ്ഥാനത്ത്.