ഖത്തര്‍ ലോകകപ്പില്‍ ഇന്നു നടക്കുന്ന ഇംഗ്ലണ്ട്-യുഎസ്എ പോരാട്ടം കാരണം ഉറക്കം നഷ്ടമായിരിക്കുകയാണ് ഇംഗ്ലണ്ടിലെ സസക്‌സ് കൗണ്ടി പ്രഭ്വിയും ബ്രിട്ടീഷ് രാജകുമാരനായ ഹാരിയുടെ ഭാര്യയുമായ മേഗന് മാര്‍ക്കിളിന്. മത്സരത്തില്‍ ജന്മനാടായ യുഎസ്എയെ പിന്തുണയ്ക്കണോ അതോ ഭര്‍ത്താവിന്റെ രാജ്യമായ ബ്രിട്ടനെ പിന്തുണയ്ക്കണോ എന്ന ആശയക്കുഴപ്പമാണ് മുന്‍ അമേരിക്കന്‍ നടിയും കൂടിയായ മേഗനെ വലയ്ക്കുന്നത്. ഇരു ടീമുകളും തോല്‍വിയറിയാതെ സമനിലയില്‍ അവസാനിക്കണമെന്നാകും ഒരുപക്ഷേ മനസ് കൊണ്ട് മേഗന്റെ പ്രാര്‍ത്ഥന.
അമേരിക്കയിലെ മുന്‍നിര സെലിബ്രിറ്റികള്‍ പലരും ലോകകപ്പ് സമയത്ത് ടീമിന് പിന്തുണ പ്രഖ്യാപിച്ചു രംഗത്ത് വരാറുമുണ്ട്. അമേരിക്കയിലെ ഫുട്‌ബോളിന്റെ കേന്ദ്രമായ ലോസ് ആഞ്ചലസിലാണ് മേഗന് മാര്‍ക്കിളിന്റെ ജനനം. ഫുട്‌ബോള്‍ ആവേശം മേഗന്റെ രക്തത്തില്‍ അലിഞ്ഞു ചേര്‍ന്ന വികാരമാണെന്നതിന് കൂടുതല്‍ തെളിവുകള്‍ നിരത്തേണ്ട ആവശ്യമില്ലല്ലോ.
ഹാരി രാജകുമാരന്റെ പത്‌നിയും ബ്രിട്ടീഷ് രാജകുടുംബത്തിലെ അംഗവുമായ മേഗന് ഇംഗ്ലണ്ടിനെ പിന്തുണയ്ക്കുമോ എന്ന് ഉറ്റുനോക്കുകയാണ് ലോകം. അമേരിക്കന്‍ വംശജയായ മേഗനെ വിവാഹം കഴിച്ചതിന് തന്നെ ശക്തമായി വിമര്‍ശനം ഹാരി രാജകുമാരന്‍ ഏറ്റുവാങ്ങിയിരുന്നു. ഇനിയിപ്പോള്‍ എതിര്‍ രാജ്യത്തെ പിന്തുണയ്ക്കുക കൂടി ചെയ്താല്‍ വിവാദങ്ങളുടെ മാലപ്പടക്കത്തിനാകും തിരികൊളുത്തുക. രാജകുടുംബാംഗം എന്ന നിലയില്‍ ഇംഗ്ലണ്ട് താരങ്ങള്‍ക്കും ടീമിനും പിന്തുണ നല്‍കുകയെന്നത് ഒരുതരത്തില്‍ മേഗന്റെ കടമയാണ്.