സ്പാനിഷ് സൂപ്പര്‍ ക്ലബ് റയല്‍ മാഡ്രിഡില്‍ നിന്ന് ഈ സീസണില്‍ മാഞ്ചസ്റ്ററിലേക്കെത്തിയ ബ്രസീല്‍ താരം കാസിമിറോ ഇംഗ്ലീഷ് പ്രീമിയര്‍ ലീഗില്‍ അരങ്ങേറിയ മത്സരത്തില്‍ മാഞ്ചസ്റ്റര്‍ യുണൈറ്റഡിന് ജയം. ഇന്നു നടന്ന മത്സരത്തില്‍ അവര്‍ സതാംപ്ടണിനെയാണ് തോല്‍പിച്ചത്. ഏകപക്ഷീയമായ ഒരു ഗോളിനായിരുന്നു ചുവന്ന ചെകുത്താന്മാര്‍ ജയിച്ചുകയറിയത്. ഗോള്‍രഹിതമായ ആദ്യ പകുതിക്കു ശേഷം മത്സരത്തിന്റെ 55-ാം മിനിറ്റില്‍ മധ്യനിര താരം ബ്രൂണോ ഫെര്‍ണാണ്ടസാണ് അവരുടെ വിജയഗോള്‍ നേടിയത്.
സൂപ്പര്‍ താരം ക്രിസ്റ്റിയാനോ റൊണാള്‍ഡോയെ ഇന്നും ബെഞ്ചിലിരുത്തിയായിരുന്നു യുണൈറ്റഡ് കളി തുടങ്ങിയത്. ആദ്യപകുതിയില്‍ ലീഡ് നേടാന്‍ അവര്‍ക്ക് സുവര്‍ണാവസരം ലഭിച്ചിട്ടും മുതലാക്കാനായില്ല. പിന്നീട് ഇടവേളയ്ക്കു ശേഷം ഡിയോഗോ ഡാലറ്റ് നല്‍കിയ പാസില്‍ നിന്നാണ് ബ്രൂണോ ടീമിനെ മുന്നിലെത്തിച്ചത്.
ലീഡ് നേടി 16 മിനിറ്റിനു ശേഷം റൊണാള്‍ഡോയൈ കോച്ച് എറിക് ടെന്‍ ഹാഗ് കളത്തിലിറക്കിയെങ്കിലും താരത്തിനു കാര്യമായ ചലനം സൃഷ്ടിക്കാനായില്ല. മത്സരം 80-ാം മിനിറ്റിലേക്കു കടന്നതോടെ സമനില ഗോളിനായി പൊരുതിയതോടെ 82-ാം മിനിറ്റില്‍ കാസിമിറോയെ ഇറക്കി ടെന്‍ഹാഗ് പ്രതിരോധം ശക്തമാക്കി.
സീസണില്‍ യുണൈറ്റഡിന്റെ രണ്ടാം ജയമാണിത്. ആദ്യ രണ്ടു മത്സരങ്ങളിലും കനത്ത തോല്‍വിയേറ്റു വാങ്ങി തുടങ്ങിയ അവര്‍ കഴിഞ്ഞ മത്സരത്തില്‍ ലിവര്‍പൂളിനെ തോല്‍പിച്ചാണ് കരകയറിയത്. ഇന്നത്തെ ജയത്തോടെ നാലു മത്സരങ്ങളില്‍ നിന്ന് രണ്ടു ജയവും രണ്ടു തോല്‍വിയുമായി ആറുപോയിന്റോടെ ആറാം സ്ഥാനത്താണ് യുണൈറ്റഡ്.