ഏഷ്യന്‍ ഗെയിംസ് ബോക്സിങ്ങില്‍ വനിതകളുടെ 50 കിലോഗ്രാം വിഭാഗം സെമി ഫൈനലില്‍ ഇന്ത്യയുടെ നിഖാത് സരീന് തോല്‍വി. തായ്ലന്‍ഡിന്റെ രാക്സത് ചുതാമതിനോടാണ് പരാജയപ്പെട്ടത്. ഇതോടെ നിഖാതിന് വെങ്കലംകൊണ്ട് തൃപ്തിപ്പെടേണ്ടതായി വന്നു. 2-3 എന്ന സ്കോറിനായിരുന്നു തോല്‍വി. ബോക്സിങ്ങില്‍ ഇന്ത്യയുടെ സ്വര്‍ണമെഡല്‍ പ്രതീക്ഷയായിരുന്നു നിഖാത്.

അതേസമയം ഏഷ്യന്‍ ഗെയിംസ് അത്ലറ്റിക്‌സില്‍ ഇന്ത്യ ആദ്യ സ്വര്‍ണം നേടി. പുരുഷന്മാരുടെ 3000 മീറ്റര്‍ സ്റ്റീപ്പിള്‍ ചെയ്‌സില്‍ ഗെയിംസ് റെക്കോര്‍ഡോഡെ അവിനാഷ് സാബിളാണ് പൊന്നണിഞ്ഞത്. എട്ട് മിനിറ്റ് 19.50 സെക്കന്‍ഡിലായിരുന്നു അവിനാഷ് ഫിനിഷ് ചെയ്തത്. ജപ്പാനാണ് വെള്ളിയും വെങ്കലവും നേടിയത്.

അവിനാഷിന്റെ നേട്ടത്തോടെ ഇന്ത്യയുടെ സ്വര്‍ണ നേട്ടം 12 ആയി ഉയര്‍ന്നു. 12 സ്വര്‍ണവും 16 വീതം വെള്ളിയും വെങ്കലവുമടക്കം 44 മെഡലുകളുമായി ഇന്ത്യ നാലാം സ്ഥാനത്താണ്. ചൈന, ദക്ഷിണ കൊറിയ, ജപ്പാന്‍ എന്നീ രാജ്യങ്ങളാണ് ഇന്ത്യക്ക് മുന്നിലുള്ളത്. ചൈനയ്ക്ക് 120 ഉം കൊറിയയ്ക്ക് 30ഉം ജപ്പാന് 29ഉം സ്വര്‍ണമാണുള്ളത്.