ഈ വര്‍ഷം ഇന്ത്യ ആതിഥേയത്വം വഹിക്കുന്ന ഐസിസി ഏകദിന ലോകകപ്പിന് തിരുവനന്തപുരം ഗ്രീന്‍ഫീല്‍ഡ് സ്റ്റേഡിയവും വേദിയാകുമെന്ന് സൂചന. ബിസിസിഐ പുറത്തിറക്കിയ 15 വേദികളുടെ ചുരുക്കപ്പട്ടികയില്‍ കാര്യവട്ടം ഗ്രീന്‍ഫീല്‍ഡ് സ്റ്റേഡിയവും ഉള്‍പ്പെട്ടിട്ടുണ്ട്.
ഗ്രീന്‍ഫീല്‍ഡിനെ കൂടാതെ അഹമ്മദാബാദ്, നാഗ്പുര്‍, ബെംഗളൂരു, മുംബൈ, ഡല്‍ഹി, ലക്‌നൗ, ഗുവാഹത്തി, ഹൈദരാബാദ്, കൊല്‍ക്കത്ത, രാജ്കോട്ട്, ഇന്‍ഡോര്‍, ധരംശാല, ചെന്നൈ എന്നീ വേദികളാണ് ചുരുക്കപ്പട്ടികയിലുള്ളത്. പരിശീലന മത്സരങ്ങള്‍ ഉള്‍പ്പെടെ ഇവിടെയായിരിക്കും നടത്തുക. ഇവയില്‍ ഏഴുവേദികളില്‍ മാത്രമായിരിക്കും ഇന്ത്യയുടെ ലീഗ് മത്സരങ്ങള്‍ ഉണ്ടാവുക. ഐപിഎല്ലിന് ശേഷം ഇത് സംബന്ധിച്ച ഔദ്യോഗിക പ്രഖ്യാപനങ്ങള്‍ ഉണ്ടാകും. ഇന്ത്യന്‍ ടീം ഫൈനലിലെത്തിയാല്‍ അഹമ്മദാബാദില്‍ ഇന്ത്യയുടെ ഒന്നില്‍ കൂടുതല്‍ മത്സരങ്ങള്‍ ഉണ്ടാകും.
ക്രിക്കറ്റിലെ ഏറ്റവും കൂടുതല്‍ ആളുകള്‍ കാത്തിരിക്കുന്ന ഇന്ത്യ-പാകിസ്താന്‍ പോരാട്ടം അഹമ്മദാബാദിലെ നരേന്ദ്രമോദി സ്‌റ്റേഡിയത്തിലാകും അരങ്ങേറുക. ഏഴ് വര്‍ഷങ്ങള്‍ക്ക് ശേഷമാണ് ഇന്ത്യന്‍ മണ്ണില്‍ ചിരവൈരികള്‍ തമ്മില്‍ ഏറ്റുമുട്ടാനൊരുങ്ങുന്നത്. അതുകൊണ്ട് തന്നെ ആ മത്സരത്തിന് ധാരാളം കാണികള്‍ ഉണ്ടാകുമെന്നാണ് ബിസിസിഐ പ്രതീക്ഷിക്കുന്നത്.