മലയാളി ബാഡ്മിന്റൺ താരം എച്ച് എസ് പ്രണോയിയ്ക്കും അത്‌ലറ്റ് എൽദോസ് പോളിനും അര്‍ജുന പുരസ്കാരം. ഇരുവരുമുള്‍പ്പെടെ 25 പേരാണ് ഇത്തവണത്തെ അര്‍ജുന പുരസ്കാരത്തിന് അര്‍ഹരായത്. രാജ്യത്തെ പരമോന്നത കായിക ബഹുമതിയായ ധ്യാൻചന്ദ് ഖേൽരത്ന പുരസ്കാരത്തിന് ടേബിൾ ടെന്നീസ് താരം ശരദ് കമൽ അർഹനായി. ഈ മാസം 30ന് രാഷ്‌ട്രപതി പുരസ്‌കാരങ്ങൾ സമ്മാനിക്കും.
തോമസ് കപ്പില്‍ കാഴ്ചവെച്ച ഉജ്ജ്വല പ്രകടനമാണ് എച്ച് എസ് പ്രണോയിയെ അര്‍ജുന നേട്ടത്തിലെത്തിച്ചത്. ക്വാർട്ടറിലും സെമിയിലും സുപ്രധാന മത്സരങ്ങളിൽ പ്രണോയ് നടത്തിയ പ്രകടനങ്ങളുടെ ബലത്തിലാണ് ഇന്ത്യൻ പുരുഷ ടീം ആദ്യമായി തോമസ് കപ്പ് നേട്ടം സ്വന്തമാക്കിയത്. ഏഷ്യൻ ചാമ്പ്യൻഷിപ്പ്, യൂത്ത് ഒളിമ്പിക്സ്, ബിഡബ്ല്യൂഎഫ് ഗ്രാൻ പ്രി, ബിഡബ്ല്യൂഎഫ് വേൾഡ് ടൂർ എന്നീ വേദികളിലും താരം തിളങ്ങയിട്ടുണ്ട്. തിരുവനന്തപുരം സ്വദേശിയാണ് പ്രണോയ്.
2022 ബർമിങ്ഹാം കോമൺവെൽത്ത് ഗെയിംസ് ട്രിപ്പിൾ ജംപ് സ്വർണ മെഡൽ ജേതാവാണ് എൽദോസ് പോൾ. ലോക അത്‌ലറ്റിക്സ് ചാന്പ്യൻഷിപ്പ് ഫൈനലിലേക്ക് യോഗ്യത നേടിയ ആദ്യ ഇന്ത്യൻ താരമെന്ന നേട്ടവും എൽദോസിന്‍റെ പേരിലാണ്. എറണാകുളം സ്വദേശിയാണ് എൽദോസ്.
ഖേൽരത്ന പുരസ്കാരം ലഭിക്കുന്ന രണ്ടാമത്തെ ടേബിൾ ടെന്നീസ് താരമാണ് ശരദ് കമൽ. 2020ല്‍ മാണിക ബത്രയാണ് ഇതിന് മുന്‍പ് ധ്യാന്‍ചന്ദ് ഖേല്‍രത്ന പുരസ്കാരം സ്വന്തമാക്കിയ ടേബിള്‍ ടെന്നീസ് താരം. ഈ വർഷം കോമൺവെൽത്ത് ഗെയിംസില്‍ ശരദ് കമൽ മൂന്ന് സ്വർണവും ഒരു വെള്ളിയും നേടിയിരുന്നു. കോമൺവെൽത്ത് ഗെയിംസിലെ ഏഴ് സ്വർണവും മൂന്ന് വെള്ളിയും മൂന്ന് വെങ്കലവും ശരദിന്റെ നേട്ടങ്ങളാണ്. രണ്ട് തവണ ഏഷ്യൻ ഗെയിംസിൽ മെഡൽ നേടിയിട്ടുണ്ട്. ഏഷ്യൻ ചാമ്പ്യൻഷിപ്പിലും വെങ്കല മെഡല്‍ നേട്ടം സ്വന്തമാക്കിയ താരമാണ് ശരദ് കമല്‍.
ഈ വർഷത്തെ അർജുന പുരസ്‌കാര ജേതാക്കളിൽ ക്രിക്കറ്റ് താരങ്ങൾ ഇല്ല എന്നതും ശ്രദ്ധേയമാണ്. കഴിഞ്ഞ നാല് വർഷത്തെ പ്രകടനമാണ് അർജുന പുരസ്കാരത്തിനുള്ള മാനദണ്ഡം. അഞ്ച് ലക്ഷം രൂപയും പ്രശസ്തി പത്രവും അടങ്ങുന്നതാണ് പുരസ്കാരം .