ലോകകപ്പ് യോഗ്യതാ റൗണ്ടില്‍ നിലവിലെ ചാമ്പ്യന്മാരായ അർജന്റീനയ്ക്ക് തോല്‍വി. എട്ടാം റൗണ്ടില്‍ കൊളംബിയയോടാണ് പരാജയപ്പെട്ടത്. ഒന്നിനെതിരെ രണ്ട് ഗോളുകള്‍ക്കായിരുന്നു കൊളംബിയയുടെ ജയം. യേഴ്‌സണ്‍ മോസ്‌ക്വേര (25), ജെയിംസ് റോഡ്രിഗസ് (90) എന്നിവരാണ് കൊളംബിയക്കായി സ്കോർ ചെയ്തത്. നിക്കോളാസ് ഗോണ്‍സാലസാണ് ലോകചാമ്പ്യന്മാരുടെ ഏക ഗോള്‍ നേടിയത്.
ലോകകപ്പ് യോഗ്യതാ റൗണ്ടിലെ അർജന്റീനയുടെ രണ്ടാം തോല്‍വിയാണിത്. നിലവില്‍ എട്ട് കളികളില്‍ നിന്ന് 18 പോയിന്റുമായി പട്ടികയില്‍ അർജന്റീന തന്നെയാണ് ഒന്നാമത്. 16 പോയിന്റുമായി കൊളംബിയ രണ്ടാം സ്ഥാനത്തുണ്ട്. ഉറുഗ്വേയാണ് മൂന്നാം സ്ഥാനത്താണ്. 15 പോയിന്റാണ് ഉറുഗ്വേയ്ക്കുള്ളത്.
അതേസമയം, അർജന്റീനയ്ക്കുപുറമെ ബ്രസീലും പരാജയം രുചിച്ചു. പരഗ്വേയോട് എതിരില്ലാത്ത ഒരു ഗോളിനായിരുന്നു തോല്‍വി. 20-ാം മിനുറ്റില്‍ ഡിയെഗോ ഗോമസാണ് പരഗ്വേയുടെ വിജയഗോള്‍ നേടിയത്. ലോകകപ്പ് യോഗ്യതാ റൗണ്ടിലെ ബ്രസീലിന്റെ നാലാം തോല്‍വിയാണിത്. കഴിഞ്ഞ അഞ്ച് മത്സരങ്ങളിലാണ് നാല് തോല്‍വിയും ബ്രസീല്‍ വഴങ്ങിയത്.
എട്ട് കളികളില്‍ നിന്ന് 10 പോയിന്റ് മാത്രമുള്ള ബ്രസീല്‍ അഞ്ചാം സ്ഥാനത്താണ് നിലവില്‍. മൂന്ന് ജയവും ഒരു സമനിലയും നാല് തോല്‍വിയുമാണ് ബ്രസീലിന്റെ പേരിലുള്ളത്. ഒക്ടോബർ 11ന് ചിലിയുമായാണ് ബ്രസീലിന്റെ അടുത്ത മത്സരം.