കൊഴിഞ്ഞു പോകാനിരിക്കുന്ന 2023 എഴുത്തിന്റെ ലോകത്ത് ഉണ്ടാക്കിയ ചലനങ്ങളെക്കുറിച്ചാണ് ഈ ലക്കത്തെ ബുക്ക് സ്റ്റോപ്പിൽ സുനീത ബാലകൃഷ്ണൻ സംസാരിക്കുന്നത്. എന്നാൽ ഏതെങ്കിലും സാഹിത്യ പുരസ്കാരങ്ങളോ, സാഹിത്യ താരകങ്ങളുടെ ഉദയമോ അസ്തമയമോ അല്ല ഈ വർഷത്തെ സാഹിത്യ ലോകത്തെ പ്രധാനപ്പെട്ട ഒന്നായി അടയാളപ്പെടുത്തുന്നത്. സാഹിത്യത്തെ ബാധിക്കാൻ പോകുന്ന ഒരു വലിയ വിപത്തിനെ തിരിച്ചറിഞ്ഞ്, അതിനെതിരെ ചർച്ചകളും എഴുത്തുകളും സമരങ്ങളും നിയമ യുദ്ധവും വരെ നടന്ന വർഷം എന്നതാണ് 2023 ന്റെ പ്രധാന പ്രത്യേകത.
എന്താണാ വിപത്ത് ? ആർട്ടിഫിഷ്യൽ ഇന്റലിജൻസ് അഥവാ നിർമിത ബുദ്ധി എന്ന സാങ്കേതിക വിദ്യ. മനുഷ്യന്റെ തലച്ചോറിന്റെ നിർമ്മിതികൾ അവിശ്വസിനീയമാം വിധം കൃത്യതയോടെ അനുകരിക്കുന്ന സൃഷ്ടികൾ ഈ സാങ്കേതിക വിദ്യ ഉപയോഗിച്ച് തയ്യാറാക്കാൻ സാധിക്കും. ഈ വസ്തുതയിൽ ഒളിഞ്ഞിരിക്കുന്ന അപകടം തിരിച്ചറിഞ്ഞതിന് പിന്നാലെ സിലിക്കൺ വാലിയും ഹോളിവുഡും ഓഥേഴ്‌സ് ഗിൽഡുമെല്ലാം ഭയചകിതരായിരുന്നു.
പല എഴുത്തുകാർ പല തരത്തിലാണ് ഈ സംവിധാനത്തിന്റെ കടന്നകയറ്റത്തോട് പ്രതികരിച്ചത്. ഈ വിപത്തിനോടുള്ള സാഹിത്യ ലോകത്തിന്റെ ചെറുത്തുനിൽപ്പ് എങ്ങനെ ആയിരുന്നു ?