ഗ്യാസ്ട്രോ പ്രശ്നങ്ങൾ പാർക്കിൻസൺസ് രോഗത്തിനുള്ള സാധ്യത വർധിപ്പിക്കുമെന്ന് പഠനം. അന്നനാളത്തിലോ വയറിലോ ഉള്ള അൾസർ ഉൾപ്പെടെയുള്ള പ്രശ്നങ്ങൾ പാർക്കിൻസൺസ് രോഗത്തിനുള്ള സാധ്യത 76 ശതമാനം വർധിപ്പിക്കുമെന്നാണ് കണ്ടത്തല്‍. അമേരിക്കൻ മെഡിക്കൽ അസോസിയേഷൻ നെറ്റ്‌വർക്ക് ഓപ്പൺ ഗവേഷകരുടെ ജേണലിൽ പ്രസിദ്ധീകരിച്ച പഠനത്തിലാണ് ഇതുസംബന്ധിച്ച വിശദാംശങ്ങൾ ഉള്ളത്.
ദഹനനാളത്തിൻ്റെ മുകളിൽ, പ്രത്യേകിച്ച്, അന്നനാളം, ആമാശയം, അല്ലെങ്കിൽ ചെറുകുടലിൻ്റെ മുകൾ ഭാഗം എന്നിവയുടെ പാളിക്ക് അൾസർ അല്ലെങ്കിൽ മറ്റ് തരത്തിലുള്ള പ്രശ്നങ്ങളുള്ള ആളുകൾക്ക് പാർക്കിൻസൺസ് രോഗം വരാനുള്ള സാധ്യത വളരെ കൂടുതലാണെന്ന് പഠനത്തിൽ പറയുന്നു.
മസ്തിഷ്‌കത്തിൽ നിന്ന് ഉണ്ടാകുന്ന ന്യൂറോ ഡിജെനറേറ്റീവ് രോഗമാണ് പാർക്കിൻസൺ. എന്നാൽ വാർദ്ധക്യ സംബന്ധമായ ഈ രോഗം കുടലിന്റെ ആരോഗ്യവുമായി ബന്ധപ്പെട്ട് കിടക്കുന്നുവെന്ന തെളിവുകളാണ് പുതിയ പഠനത്തിൽ ഉള്ളത്.
ന്യൂറോ ഡീജനറേറ്റീവ് ഡിസോർഡേഴ്സ് ഉള്ള രോഗികളിൽ ഗ്യാസ്ട്രോഇൻ്റസ്റ്റൈനൽ പ്രശ്നങ്ങൾ സാധാരണമാണെന്ന് പഠനത്തിന്റെ പറയുന്നു. പാർക്കിൻസൺസ് രോഗമുള്ള രോഗികൾക്ക് ദഹനനാളത്തിൻ്റെ തകരാറുകൾ അനുഭവപ്പെടുന്നതായി യുഎസിലെ ബെത്ത് ഇസ്രായേൽ ഡീക്കനെസ് മെഡിക്കൽ സെൻ്ററിലെ ഗവേഷകർ പറഞ്ഞു.
ദഹനസംബന്ധമായ പ്രശ്‌നങ്ങളിൽ മലബന്ധം, വായിൽ നിന്ന് ഉമിനീർ ഒലിക്കൽ, ഭക്ഷണം വിഴുങ്ങാനുള്ള ബുദ്ധിമുട്ട്, ആമാശയത്തിലെ കാലതാമസം എന്നിവ ഉൾപ്പെടുമെന്ന് പഠനം ചൂണ്ടിക്കാട്ടുന്നു. മലബന്ധവും ഭക്ഷണം വിഴുങ്ങാനുള്ള ബുദ്ധിമുട്ടും അപകടകരമായ പ്രവണതയാണെന്നും അവ പാർക്കിൻസൺസ് രോഗസാധ്യത ഇരട്ടിയാക്കുമെന്നും പഠനം പറയുന്നു.
കുടലും പാർക്കിൻസൺസ് രോഗത്തിൻ്റെ അപകടസാധ്യതയും തമ്മിലുള്ള ബന്ധത്തിന് കാരണം ദഹനത്തിൽ പ്രധാന പങ്ക് വഹിക്കുന്ന മസ്തിഷ്ക രാസവസ്തുവായ ഡോപാമൈൻ നിയന്ത്രിക്കുന്നതിലെ പ്രശ്‌നങ്ങളായിരിക്കാം. ആൽഫ-സിന്യൂക്ലിൻ എന്ന പ്രോട്ടീൻ്റെ രൂപീകരണത്തിന് ദഹനനാളത്തിൻ്റെ രോഗങ്ങൾ കാരണമാകുന്നു. അങ്ങനെയാണ് പാർക്കിൻസൺസ് രോഗം തലച്ചോറിൽ ഉണ്ടാകുന്നത്, പഠനം വ്യക്തമാക്കുന്നു.
ഭാവിയിലെ ഗവേഷണങ്ങൾ വിഷയത്തിൽ കൂടുതൽ വ്യക്തത വരുത്തുമെന്നും ഗവേഷകർ വ്യക്തമാക്കി.