ഉത്തരാഖണ്ഡിൽ നടക്കുന്ന ഇന്ത്യ- അമേരിക്ക സൈനികാഭ്യാസത്തെ വിമർശിച്ച ചൈനയ്‌ക്കെതിരെ ആഞ്ഞടിച്ച് ഇന്ത്യ. സായുധസേനകളുടെ സംയുക്ത അഭ്യാസം അതിർത്തി സമാധാനത്തിനായുള്ള ചൈന-ഇന്ത്യ ഉഭയകക്ഷി കരാറുകളുടെ ലംഘനമാണെന്ന ചൈനയുടെ വാദത്തെ ഇന്ത്യ ശക്തമായി എതിർത്തു. ആരുമായി സൈനികാഭ്യാസം നടത്തണമെന്ന് തീരുമാനമെടുക്കാനുള്ള വീറ്റോ അധികാരം മൂന്നാമതൊരു രാജ്യത്തിന് ഇന്ത്യ നൽകിയിട്ടില്ലെന്ന് വിദേശകാര്യ മന്ത്രാലയം ആഞ്ഞടിച്ചു.

ചൈനീസ് അതിര്‍ത്തിയോട് ചേര്‍ന്ന ഉത്തരാഖണ്ഡിലെ ഔലിയില്‍ ആണ് ഇന്ത്യ- അമേരിക്ക സംയുക്ത സൈനികാഭ്യാസം നടക്കുന്നത്. ഇത് 1993ലും 1996ലും ഒപ്പുവെച്ച ഇന്ത്യ - ചൈന കരാറുകളുടെ ലംഘനമാണെന്നും ഉഭയകക്ഷി വിശ്വാസം വളർത്തിയെടുക്കുന്നതിൽ പ്രതികൂലമായി ബാധിക്കുമെന്നും ചൈന ഇന്ത്യയെ അറിയിച്ചു. എന്നാൽ, കിഴക്കൻ ലഡാക്കിലുണ്ടായ ചൈനീസ് ആക്രമണം ഉൾപ്പെടെ ചൂണ്ടിക്കാട്ടി ചൈനയുടെ ഉഭയകക്ഷി കരാറുകളുടെ ലംഘനം ഓർത്തുനോക്കണമെന്ന് ഇന്ത്യ മറുപടി നല്‍കി. ഇന്ത്യ - യുഎസ് സൈനിക അഭ്യാസത്തിന് ഉഭയകക്ഷി കരാറുകളുമായി യാതൊരു ബന്ധവുമില്ലെന്നും ഇന്ത്യ നിലപാടെടുത്തു.

"ഇത്തരം ആരോപണങ്ങൾ ചൈനയുടെ ഭാഗത്ത് നിന്നാണ് ഉന്നയിക്കപ്പെട്ടിരിക്കുന്നത്. അതിനാല്‍ തന്നെ 1993-ലെയും 1996-ലെയും ഉടമ്പടികളിന്മേല്‍ ചൈന നടത്തിയ ലംഘനം എടുത്തുപറയേണ്ടതുണ്ട്. ഇന്ത്യ, തിരഞ്ഞെടുക്കുന്നവരുമായി സൈനിക അഭ്യാസം നടത്തുന്നു. ഈ വിഷയങ്ങളിൽ മൂന്നാം രാജ്യങ്ങൾക്ക് വീറ്റോ നൽകുന്നില്ല" - വിദേശകാര്യ വക്താവ് അരിന്ദം ബാഗ്ചി പറഞ്ഞു.

ചൈന-ഇന്ത്യ അതിർത്തി കരാറുകളിലും തർക്കങ്ങളിലും ഇടപെടാനുള്ള അമേരിക്കയുടെ തന്ത്രമായാണ് ചൈന സൈനികാഭ്യാസത്തെ കാണുന്നത്. ഇന്ത്യ - ചൈന ബന്ധത്തില്‍ ഇടപെടരുതെന്ന് ചൈന അമേരിക്കയ്ക്ക് കഴിഞ്ഞ ദിവസം മുന്നറിയിപ്പ് നല്‍കിയാതായി യുഎസ് കോണ്‍ഗ്രസില്‍ സമര്‍പ്പിച്ച റിപ്പോര്‍ട്ടിൽ പെന്റഗൺ സ്ഥിരീകരിച്ചിരുന്നു. നിയന്ത്രണരേഖകളില്‍ ഇന്ത്യ - ചൈന സംഘര്‍ഷം ഗുരുതരമല്ലെന്ന് കാണിക്കാനായിരുന്നു ചൈനീസ് ഇടപെടലെന്നും പെന്റഗണ്‍ വ്യക്തമാക്കി.

നിയന്ത്രണരേഖയില്‍ സമാധാനപരമായ അന്തരീക്ഷം നിലനിർത്തുന്നതുമായി ബന്ധപ്പെട്ടതാണ് 1993-ലെ ഇന്ത്യ - ചൈന കരാർ. അതേസമയം, 1996-ലെ ഉടമ്പടിയിൽ ഇന്ത്യ-ചൈന അതിർത്തി പ്രദേശങ്ങളിലും നിയന്ത്രണരേഖ ഉൾപ്പെടെയുള്ള മേഖലയിലും സൈന്യത്തില്‍ ആത്മവിശ്വാസം വളർത്തുന്നതിനുള്ള നടപടികൾ ഉൾക്കൊള്ളുന്നതാണ്.