അമേരിക്കയിലെ കാലിഫോർണിയയില്‍ വെടിവെയ്പ്പിൽ 11 പേർ കൊല്ലപ്പെട്ടെന്ന് റിപ്പോർട്ട്. മോണ്ടെറി പാർക്കിൽ രാത്രി 10 മണിക്ക് ശേഷം നടന്ന ചൈനീസ് ചാന്ദ്ര പുതുവത്സര ആഘോഷത്തിനിടെയാണ് സംഭവമെന്ന് ലോസ് ഏഞ്ചല്‍സ് ടൈംസ് റിപ്പോർട്ട് ചെയ്തു. പതിനായിരക്കണക്കിന് പേരാണ് ആഘോഷത്തിന് എത്തിയിരുന്നത്. മരണസംഖ്യ സംബന്ധിച്ച് ഔദ്യോഗിക സ്ഥിരീകരണം പുറത്തുവന്നിട്ടില്ല. പോലീസ് അക്രമിക്കായുള്ള തിരച്ചിൽ തുടരുകയാണ്.

രണ്ട് ദിവസമായാണ് ഇവിടെ ചൈനീസ് പുതുവത്സരാഘോഷം സംഘടിപ്പിക്കാറുള്ളത്. ലോസ് ഏഞ്ചൽസ് കൗണ്ടിയിൽ നിന്ന് 11 കിലോമീറ്റർ അകലെയുള്ള നഗരമാണ് മോണ്ടെറി പാർക്ക്. അമേരിക്കയില്‍ സമാന സംഭവങ്ങൾ പതിവാണ്. ഗൺ വയലൻസ് ആർക്കൈവിൽ നിന്നുള്ള ഡാറ്റ അനുസരിച്ച് 2020 ൽ രാജ്യത്ത് 43,000 തോക്ക് അക്രമ സംഭവങ്ങളാണ് ഉണ്ടായത്. അതിന്റെ ഫലമായി ഒരു ലക്ഷത്തിലധികം പേർ മരിച്ചു. കൂട്ടക്കൊലകൾ, കൊലപാതകങ്ങൾ, ആത്മഹത്യകൾ എന്നിവ ഇതിൽ ഉൾപ്പെടുന്നുണ്ട്.