പലസ്തീൻ ജനതയ്ക്ക് ഐക്യദാർഡ്യം പ്രകടിപ്പിച്ച് സ്വീഡിഷ് പരിസ്ഥിതി പ്രവർത്തക ഗ്രെറ്റ തുൻബെർഗ് എക്‌സിൽ (ട്വിറ്റർ) പോസ്റ്റ് ചെയ്ത ചിത്രം മണിക്കൂറുകൾ കഴിഞ്ഞ് പിൻവലിച്ചു. ചിത്രത്തിൽ ഒരു നീരാളിയുടെ പാവയുണ്ടായിരുന്നു എന്നതാണ് ചിത്രം നീക്കാൻ കാരണം. നീരാളി (ഒക്ടോപസ്) സെമറ്റിക് വിരുദ്ധതയെയാണ് പ്രതീകവൽക്കരിക്കുന്നതെന്നും, ഗ്രെറ്റ പോസ്റ്റിലൂടെ സെമിറ്റിക് വിരുദ്ധത പ്രചരിപ്പിക്കുകയാണെന്നുമുള്ള വിമർശനങ്ങൾ ഉയർന്ന സാഹചര്യത്തിലാണ് പോസ്റ്റ് നീക്കം ചെയ്തത്. ശേഷം എഡിറ്റ് ചെയ്ത ഫോട്ടോ വീണ്ടും ഗ്രെറ്റ പോസ്റ്റ് ചെയ്തു. ജൂതർക്കെതിരെ നാസികൾ പ്രചരിപ്പിച്ച കാരിക്കേച്ചറാണ് ഒക്ടോപസ്.
പലസ്‌തീനും ഗാസയ്ക്കും ഐക്യദാർഡ്യം പ്രഖ്യാപിച്ചുകൊണ്ട് ഞങ്ങൾ പ്രതിഷേധിക്കുന്നുവെന്നും ആഗോള സമൂഹം പ്രശ്നപരിഹാരത്തിനായി ശബ്ദമുയർത്തണമെന്നും, ബുദ്ധിമുട്ടനുഭവിക്കുന്ന എല്ലാ പലസ്തീനികൾക്കും സമാധാനവും സ്വാതന്ത്ര്യവുമുണ്ടാകണമെന്നും ഗ്രെറ്റ പോസ്റ്റിൽ പറയുന്നു.
ഫോട്ടോ പോസ്റ്റ് ചെയ്തയുടനെ തന്നെ ഈ ഫോട്ടോയിൽ ഒരു നീരാളിക്ക് എന്താണ് കാര്യം എന്നും, അത് ജൂത വിരുദ്ധതയാണെന്നും പറഞ്ഞ് നിരവധി പോസ്റ്റുകളാണ് എക്‌സിൽ പ്രത്യക്ഷപ്പെട്ടത്.
ഫോട്ടോ പിൻവലിച്ച ഗ്രെറ്റ എഡിറ്റ് ചെയ്ത ഫോട്ടോ പോസ്റ്റ് ചെയ്തുകൊണ്ട്, നേരത്തെ പോസ്റ്റ് ചെയ്ത ഫോട്ടോയിലുണ്ടായിരുന്ന ഒക്‌ടോപ്പസ് സെമിറ്റിക് വിരുദ്ധതയായി ചിലർക്കെങ്കിലും തോന്നാനിടയുണ്ടെന്നു തിരിച്ചറിയുന്നതായും, അത് ശ്രദ്ധയിൽ പെടാതെ പോയതാണെന്നും കുറിച്ചു. ചിത്രത്തിൽ കണ്ട നീരാളിയുടെ പാവ ഓട്ടിസം ബാധിച്ച കുട്ടികൾ മറ്റുള്ളവരുമായി ആശയവിനിമയം നടത്താൻ ഉപയോഗിക്കുന്നതാണെന്നും എഴുതി. ഏതു വിധേനയുള്ള സെമിറ്റിക് വിരുദ്ധതയ്ക്കും തങ്ങൾ എതിരാണെന്നും, അത് വിട്ടുവീഴ്ച ചെയ്യാൻ സാധിക്കാത്ത കാര്യമാണെന്നു ബോധ്യമുള്ളതുകൊണ്ടാണ് പോസ്റ്റ് നീക്കം ചെയ്തതെന്നും ഗ്രെറ്റ കുറിച്ചു.
എന്നാൽ ഇസ്രയേൽ ശക്തമായ ഭാഷയിലാണ് ഗ്രെറ്റയ്ക്ക് മറുപടി നൽകിയത്. 'ഹമാസ് പുനരുപയോഗിക്കാൻ സാധിക്കുന്ന വസ്തുക്കൾ ചേർത്തല്ല റോക്കറ്റുകൾ ഉണ്ടാക്കിയിട്ടുള്ളത്. അതാണ് ഇസ്രയേലികളുടെ കൂട്ടക്കൊലയ്ക്ക് ഉപയോഗിക്കുന്നത്. ഹമാസിന്റെ ഭീകരതയിൽ കൊല്ലപ്പെട്ടവർക്ക് വേണ്ടിയും സംസാരിക്കൂ' എന്നും ഇസ്രായേൽ ഗ്രെറ്റയ്ക്ക് മറുപടി നൽകി.