49,999 രൂപയ്ക്ക് എക്സ്-വൺ പ്രൈം, എയ്‌സ് മോഡലുകള്‍; ഇലക്ട്രിക് സ്‌കൂട്ടര്‍ വിപണിയില്‍ സജീവമാകാന്‍ കൊമാകി
എക്സ്-വണ്‍ പ്രൈം, എക്സ്-വണ്‍ എയ്‌സ് മോഡലുകളുമായി എക്സ്-വണ്‍ ലിഥിയം സ്‌കൂട്ടര്‍ സിരീസ് വിപുലമാക്കി കൊമാകി ഇലക്ട്രിക് വെഹിക്കിള്‍. 49,999 രൂപ മുതല്‍ 59,999 രൂപ വരെയാണ് ഈ സ്‌കൂട്ടറുകളുടെ എക്സ് ഷോറൂം വില. വാഹനത്തിനൊപ്പം ബാറ്ററി, ചാര്‍ജര്‍, ആക്‌സസറികള്‍ എന്നിവ കൂടി ഉള്‍പ്പെടുന്നതാണ് ഈ വില. ആകര്‍ഷകമായ കിഴിവുകളും കമ്പനികളും വാഗ്ദാനം ചെയ്യുന്നു.
റീജനറേറ്റീവ് ബ്രേക്കിങ്, ഓട്ടോ-റിപ്പയര്‍ ഫങ്ഷന്‍ തുടങ്ങിയവ കൊമാകി എക്സ്-വണ്‍, പ്രൈം, എക്സ്-വണ്‍ എയ്‌സ് ഇലക്ട്രിക് സ്‌കൂട്ടര്‍ മോഡലുകളുടെ പ്രത്യേകതയാണ്. ഈ സവിശേഷതകള്‍ സ്വയം പ്രശ്‌നങ്ങള്‍ കണ്ടെത്താനും പരിഹരിക്കാനും സ്‌കൂട്ടറുകളെ പ്രാപ്തമാക്കുന്നു. ഇതുമൂലം വാഹനങ്ങള്‍ തകരാര്‍ ഉണ്ടാകാനുള്ള സാധ്യത കുറയുമെന്നാണു കമ്പനി അവകാശപ്പെടുന്നത്.
2-2.2 കെഡബ്ല്യുഎച്ച് ലിഥിയം ബാറ്ററിയാണ് ഇരു മോഡലുകളുടെയും കരുത്ത്. നാല്-അഞ്ച് മണിക്കൂര്‍ കൊണ്ട് പൂര്‍ണമായും ചാര്‍ജ് ചെയ്യാന്‍ കഴിയും. ഒറ്റ ചാര്‍ജില്‍ 100 മുതല്‍ 150 കിലോമീറ്റര്‍ വരെ സഞ്ചരിക്കാന്‍ കഴിയും.
പാര്‍ക്കിങ് അസിസ്റ്റ്, ക്രൂയിസ് കണ്‍ട്രോള്‍, റിവേഴ്‌സ് അസിസ്റ്റ്, കീ ഫോബ് വഴിയുള്ള കീലെസ് എന്‍ട്രി എന്നിവയും എക്സ്-വണ്‍, പ്രൈം, എക്സ്-വണ്‍ എയ്‌സ് മോഡലുകളുടെ പ്രത്യേകതകളാണ്. എല്‍ഇഡി ലൈറ്റിങ്, ബിഎല്‍ഡിസി ഹബ് മോട്ടോറുകള്‍, ഡിജിറ്റല്‍ ഇന്‍സ്ട്രുമെന്റ് ക്ലസ്റ്ററുകള്‍ എന്നീ സംവിധാനങ്ങളുമുണ്ട്.
ആകര്‍ഷമായ നിറങ്ങളാണ് മറ്റൊരു പ്രത്യേകത. ഗാര്‍നെറ്റ് റെഡ്, ഫ്രോസ്റ്റ് വൈറ്റ്, ജെറ്റ് ബ്ലാക്ക്, സൂപ്പര്‍ മെറ്റല്‍ ഗ്രേ എന്നിവ ഇക്കൂട്ടത്തില്‍ ഉള്‍പ്പെടുന്നു.
45,999 രൂപ വിലയുള്ള ലോ-സ്പീഡ് വേരിയന്റുകളില്‍ മോട്ടോര്‍, ബാറ്ററി, കണ്‍ട്രോളര്‍ എന്നിവയില്‍ മൂന്നു വര്‍ഷത്തെ വാറന്റി കമ്പനി വാഗ്ദാനം ചെയ്യുന്നു. 30,000 കിലോമീറ്റര്‍ വരെയാണ് വാറന്റി.
