റോഡ്‌സ്റ്റർ, റോഡ്‌സ്റ്റർ എക്സ്, റോഡ്‌സ്റ്റർ പ്രോ: മൂന്ന് വേരിയന്റുകളിൽ റോഡ്‌സ്റ്റർ സീരീസ് ഇലക്ട്രിക് മോട്ടോർ സൈക്കിൾ അവതരിപ്പിച്ച് ഒല
ഇലക്ട്രിക് റോഡ്‌സ്റ്റർ സീരീസ് ഇ-മോട്ടോർസൈക്കിളുകൾ ഔദ്യോഗികമായി പുറത്തിറക്കി ഒല. കമ്പനിയുടെ ജെൻ 3 പ്ലാറ്റ്‌ഫോമിനെ അടിസ്ഥാനമാക്കിയുള്ള ആദ്യത്തെ ഇലക്ട്രിക് മോട്ടോർസൈക്കിൾ സീരീസാണിത്. മൂന്ന് വേരിയൻ്റുകളിൽ പുറത്തിറക്കിയ ശ്രേണിയുടെ വില 74,999 രൂപ മുതലാണ് ആരംഭിക്കുന്നത്.
റോഡ്‌സ്റ്റർ, റോഡ്‌സ്റ്റർ എക്സ്, റോഡ്‌സ്റ്റർ പ്രോ എന്നിങ്ങനെയാണ് ശ്രേണിയുടെ മൂന്ന് വേരിയൻ്റുകൾ. റോഡ്‌സ്റ്റർ എക്‌സും റോഡ്‌സ്റ്ററും ഡെലിവറി അടുത്ത വർഷം ജനുവരിയിൽ ആരംഭിക്കും. എന്നാൽ റോഡ്‌സ്റ്റർ പ്രോയ്‌ക്കായി 2025 ദീപാവലി വരെ കാത്തിരിക്കണം. എന്നിരുന്നാലും എല്ലാ മോഡലുകളുടെയും ബുക്കിംഗ് ഇന്ന് ആരംഭിക്കും. നിലവിൽ ഇന്ത്യയിൽ ഏറ്റവുമധികം ഇലക്ട്രിക് സ്കൂട്ടറുകൾ വിൽക്കുന്നത് ഒല ഇലക്ട്രിക്കാണ്.
മൂന്ന് പതിപ്പുകളും താരതമ്യം ചെയ്യുമ്പോൾ ഏറ്റവും ബഡ്ജറ്റ് ഫ്രണ്ട്‌ലി റോഡ്‌സ്റ്റർ എക്സ് ആണ്. 74,999 രൂപ ആണ് ഇതിന്റെ വില. കൂടാതെ 2.5 kWh ബാറ്ററി പാക്കും ഒരു തവണ ചാർജ് ചെയ്താൽ 200 കിലോമീറ്റർ ക്ലെയിം ചെയ്യാവുന്ന റേഞ്ചും ഉണ്ട്. മോട്ടോർസൈക്കിളിന് മണിക്കൂറിൽ 124 കിലോമീറ്റർ വേഗതയുണ്ട്, ഇതിന് 2.8 സെക്കൻഡിനുള്ളിൽ മണിക്കൂറിൽ 0-40 കിലോമീറ്റർ വേഗത കൈവരിക്കാനാകും. റോഡ്‌സ്റ്റർ എക്‌സിന് 18 ഇഞ്ച് അലോയ് വീലുകളും 4.3 ഇഞ്ച് ടച്ച്‌സ്‌ക്രീൻ ഡിസ്‌പ്ലേയും ലഭിക്കുന്നു.
റോഡ്‌സ്റ്റർ അഥവാ മിഡ് വേരിയൻ്റിന് 1,04,999 ആണ് പ്രാരംഭ വില. 2.5 kWh വേരിയൻ്റിന് ആണിത്. 4.5 kWh വേരിയൻ്റിന് ₹ 1,19,999, 6 kWh വേരിയൻ്റിന് ₹ 1,39,999 എന്നിങ്ങനെയാണ് പ്രാരംഭ വില. മണിക്കൂറിൽ 126 കിലോമീറ്റർ വേഗതയുള്ള ഇതിന് 2.2 സെക്കൻഡിനുള്ളിൽ 0-40 കിലോമീറ്റർ വേഗത കൈവരിക്കാനാകും. ഒറ്റ ചാർജിൽ 579 കിലോമീറ്ററാണ് അവകാശപ്പെടുന്ന റേഞ്ച്. റോഡ്‌സ്റ്ററിന് 7 ഇഞ്ച് വലിയ ടച്ച്‌സ്‌ക്രീൻ ഉണ്ട്, കൂടാതെ ഡയമണ്ട് കട്ട് അലോയ് വീലുകളും ഇതിന്റെ പ്രത്യേകതയാണ്.
ഏറ്റവും മികച്ച വേരിയൻ്റായ റോഡ്‌സ്റ്റർ പ്രോ, 8KWH-ന് ₹ 1,99,999-നും 16 KWH പതിപ്പിന് ₹ 2,49,999-നും പ്രാരംഭ വിലയ്ക്ക് സ്വന്തമാക്കാം. മറ്റ് രണ്ട് വേരിയൻ്റുകൾ നോക്കുമ്പോൾ വിലയിൽ വൻ കുതിച്ചു ചാട്ടം ഉണ്ടെങ്കിലും, മോട്ടോർസൈക്കിളിന് മണിക്കൂറിൽ 194 കിലോമീറ്റർ വേഗതയുണ്ടെന്നാണ് കമ്പനി അവകാശപ്പെടുന്നത്. ഒറ്റ ചാർജിൽ 579 കിലോമീറ്റർ റേഞ്ച് ലഭിക്കും. റോഡ്‌സ്റ്റർ പ്രോയ്ക്ക് വിപുലമായ ഡ്രൈവർ-അസിസ്റ്റൻസ് സിസ്റ്റവും (ADAS) അതിലും വലിയ 10 ഇഞ്ച് ടച്ച്‌സ്‌ക്രീനും ലഭിക്കുന്നു.
