ഓ മൈ ഗോഡ് 2 വിലെ ശിവ ലുക്ക്, വീഡിയോ പങ്കുവച്ച് അക്ഷയ് കുമാർ; ടീസർ ഉടനെന്ന് താരം
പ്രേക്ഷകർ ആകാംക്ഷയോടെ കാത്തിരിക്കുന്ന ചിത്രം 'ഓ മൈ ഗോഡ് 2' വിന്റെ ഷോർട്ട് വീഡിയോ പങ്കുവച്ച് ബോളിവുഡ് താരം അക്ഷയ് കുമാർ. ജൂലൈ 11ന് ചിത്രത്തിന്റെ ടീസർ പുറത്തിറങ്ങുമെന്നും ഓഗസ്റ്റ് 11 ന് സിനിമ തീയേറ്ററുകളിൽ എത്തുമെന്നും വീഡിയോ പങ്കുവെച്ചുകൊണ്ട് താരം ട്വീറ്റ് ചെയ്തു. ഡ്രെഡ്‌ലോക്ക് ചെയ്ത മുടിയും രുദ്രാക്ഷ മാലയുമണിഞ്ഞ് ശിവന്റെ ലുക്കിലാണ് ചിത്രത്തിൽ താരമെത്തുന്നത്.
സമ്മിശ്ര പ്രതികരണമാണ് താരത്തിന്റെ ലുക്കിന് ലഭിച്ചത്. ചിത്രം ഹിന്ദു മതത്തേയും വിശ്വാസികളേയും വ്രണപ്പെടുത്തില്ലെന്നാണ് പ്രതീക്ഷയെന്ന് ഒരു ആരാധകൻ ട്വീറ്റ് ചെയ്തു. മറ്റു ചിലർ താരത്തിന്റെ ലുക്കിനെ അഭിനന്ദിക്കുകയും "ഹർ ഹർ മഹാദേവ്" എന്നും കമന്റ് ചെയ്തു.
അമിത് റായ് സംവിധാനത്തിലെത്തുന്ന ഓ മൈ ഗോഡ് 2ൽ പങ്കജ് ത്രിപാഠി, യാമി ഗൗതം, അരുൺ ഗോവിൽ എന്നിവരും പ്രധാന വേഷങ്ങളിലെത്തുന്നുണ്ട്. ഓഗസ്റ്റ് 11നാണ് ചിത്രത്തിന്റെ റിലീസ്. 2012ൽ റിലീസായ ഓ മൈ ഗോഡ് ഒന്നാം ഭാഗം ഉമേഷ് ശുക്ലയാണ് തിരക്കഥയെഴുതി സംവിധാനം ചെയ്തത്. അക്ഷയ് കുമാർ, പരേഷ് റാവൽ, മിഥുൻ ചക്രബർത്തി എന്നിവരാണ് ചിത്രത്തിൽ പ്രധാന വേഷത്തിൽ എത്തിയത്. കോമഡി വിഭാഗത്തിൽപ്പെടുന്നതാണ് ചിത്രം.
അതേസമയം ജൂലൈ 12ന് റിലീസാകുന്ന ടോം ക്രൂസ് ചിത്രം 'മിഷൻ ഇംപോസിബിൾ 7'ൽ ഓ മൈ ഗോഡ് 2വിന്റെ ടീസർ അറ്റാച്ച് ചെയ്യുമെന്ന് റിപ്പോർട്ടുകൾ പുറത്തുവന്നിരുന്നു.
