'ഞാന്‍ ആഗ്രഹിച്ചിരുന്ന സ്വപ്നം'; ഷാരൂഖ് ഖാന് നന്ദി പറഞ്ഞ് അറ്റ്‌ലി
ഷാരൂഖ് ഖാനെ നായകനാക്കി അറ്റ്‌ലി സംവിധാനം ചെയ്യുന്ന ജവാന്‍ തിയേറ്റര്‍ റിലീസിനായുള്ള ഒരുക്കത്തിലാണ്. വലിയ പ്രതീക്ഷയോടെയാണ് ചിത്രത്തിനായി പ്രേക്ഷകര്‍ കാത്തിരിക്കുന്നത്.ചിത്രത്തെക്കുറിച്ചുള്ള വാര്‍ത്തകള്‍ക്കെല്ലാം വലിയ പ്രേക്ഷക സ്വീകാര്യതയാണ് ലഭിക്കുന്നത്. തന്റെ ആദ്യ ബോളിവുഡ് ചിത്രത്തിന്റെ ഭാഗമായതിനും വലിയ പിന്തുണ നല്‍കിയതിനും ഷാരൂഖ് ഖാന് നന്ദി പറഞ്ഞുകൊണ്ടുള്ള അറ്റ്ലിയുടെ ട്വീറ്റാണ് ഇപ്പോള്‍ ശ്രദ്ധേയമാകുന്നത്.
മൂന്ന് വര്ഷമായി സിനിമക്ക് വേണ്ടി ഷാരൂഖ് ഖാന്റെ കൂടെ നില്‍ക്കാന്‍ തനിക്ക് കഴിഞ്ഞുവെന്നും സിനിമയോടുള്ള അദ്ദേഹത്തിന്റെ അഭിനിവേശം തനിക്ക് പ്രചോദനവും ആത്മവിശ്വാസവും നല്‍കിയെന്നും അറ്റ്‌ലി ട്വിറ്ററില്‍ കുറിച്ചു.
''ഞാന്‍ എപ്പോഴും ആഗ്രഹിച്ചിരുന്ന സ്വപ്നത്തിലാണ് ഇപ്പോള്‍ ജീവിക്കുന്നതെന്ന് തോന്നുന്നു. ഒരുപാട് നന്ദിയുണ്ട്. ഈ സിനിമ എന്റെ പരിധികള്‍ക്കും അപ്പുറമായിരുന്നു. ഈ സിനിമയിലൂടെ വിലമതിക്കാനാവാത്ത ഒരുപാട് പാഠങ്ങള്‍ ഞാന്‍ പഠിച്ചു. സിനിമയോടുള്ള നിങ്ങളുടെ അഭിനിവേശം കഴിഞ്ഞ മൂന്ന് വര്ഷമായി അടുത്ത് കാണുകയാണ്. അത് എനിക്ക് അധ്വാനിക്കാനുള്ള പ്രചോദനവും ആവേശവും നല്‍കുന്നവയാണ്. ലവ് യു സര്‍. ഈ മികച്ച അവസരത്തിന് മുഴുവന്‍ ടീമിന്റെയും പേരില്‍ ഒരിക്കല്‍ കൂടി നന്ദി പറയുന്നു,'' അറ്റ്‌ലി ട്വിറ്ററില്‍ കുറിച്ചു.
അറ്റ്‌ലിക്ക് നന്ദി അറിയിച്ച് ചൊവ്വാഴ്ച ഷാരൂഖ് ട്വീറ്റ് ചെയ്തിരുന്നു. ഇതിന് മറുപടിയായാണ് അറ്റ്ലിയുടെ ട്വീറ്റ്. സമൂഹത്തിലെ പ്രശ്‌നങ്ങള്‍ പരിഹരിക്കാന്‍ ഒരുങ്ങുന്ന ഒരാളുടെ യാത്രയാണ് ആക്ഷന്‍ ത്രില്ലറായ ജവാന്‍. കഴിഞ്ഞദിവസം പുറത്തിറങ്ങിയ പ്രിവ്യൂന് (ടീസര്) മികച്ച പ്രതികരണമാണ് പ്രേക്ഷകരില്‍ നിന്നും ലഭിച്ചത്. ഷാരൂഖ് ഖാന്റെ ശബ്ദശകലത്തിലൂടെയാണ് ട്രെയ്‌ലര്‍ ആരംഭിച്ചത്. ഇത് ചിത്രത്തെക്കുറിച്ചുള്ള പ്രേക്ഷകരുടെ ആകാംക്ഷ വര്‍ധിപ്പിച്ചിരിക്കുകയാണ്.
ഇതുവരെ കണ്ടിട്ടില്ലാത്ത കഥാപാത്രമായാണ് ഷാരൂഖ് ചിത്രത്തിലെത്തുന്നതെന്നാണ് പ്രിവ്യൂ(ടീസര്) നല്‍കുന്ന സൂചന. കൂടാതെ, ഇന്ത്യന്‍ സിനിമയിലുടനീളമുള്ള ശ്രദ്ധേയരായ അഭിനേതാക്കളെയാണ് പ്രിവ്യൂവിൽ കാണുന്നത്. തകര്‍പ്പന്‍ ആക്ഷന്‍ സീക്വന്‍സുകളുടെയും ഗംഭീര ഗാനങ്ങളുടെയും ക്ലിപ്പുകള്‍ക്കൊപ്പം മൊട്ടത്തലയുള്ള ലുക്കിലാണ് ഷാരൂഖിനെ കാണിച്ചിരിക്കുന്നത്.
വിജയ്ചിത്രങ്ങളിലൂടെ പേരുകേട്ട ആറ്റ്ലിയുടെ ചിത്രത്തിനായി ബോളിവുഡ് മാത്രമല്ല, നിരവധി ഭാഷകളിലായുള്ള ആരാധകരാണ് കാത്തിരിക്കുന്നത്. അനിരുദ്ധാണ് പശ്ചാത്തല സംഗീതം നല്‍കുന്നത്. 4 വര്‍ഷത്തെ ഇടവേളകള്‍ക്ക് ശേഷം തിരിച്ചെത്തിയ ഷാരൂഖ് ഖാന്റെ രണ്ടാമത്തെ ചിത്രമാണ് 'ജവാന്‍'.
ഷാരൂഖ്, നയന്‍താര, വിജയ് സേതുപതി എന്നിവര്‍ പ്രധാന വേഷങ്ങളിലെത്തുന്ന ചിത്രത്തില്‍ സന്യ മല്‍ഹോത്രയ്ക്കൊപ്പം ദീപിക പദുക്കോണും ഒരു പ്രത്യേക വേഷത്തില്‍ എത്തുന്നുണ്ട്. പ്രിയാമണി, ഗിരിജ ഓക്ക്, സഞ്ജീത ഭട്ടാചാര്യ, ലെഹര്‍ ഖാന്, ആലിയ ഖുറേഷി, റിധി ഡോഗ്ര, സുനില്‍ ഗ്രോവര്‍, മുകേഷ് ഛബ്ര എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. സെപ്റ്റംബര്‍ 7നാണ് ചിത്രം തിയേറ്ററുകളില്‍ എത്തുക.
