ധനുഷിന്റെ കരിയറിലെ ആദ്യ 150 കോടി ക്ലബ്; ഇരട്ട റെക്കോഡുമായി'രായൻ'

ധനുഷിന്റെ കരിയറിലെ ആദ്യ 150 കോടി ക്ലബ് ചിത്രമായി 'രായൻ'. സ്വന്തം സംവിധാനത്തിലെത്തിയ ചിത്രം ഈ വർഷം 150 കോടി ക്ലബ്ബിലെത്തുന്ന ആദ്യ തമിഴ് ചിത്രമാണ്. ബോക്സോഫീസിൽ ഇപ്പോഴും കുതിപ്പ് തുടരുകയാണ് ചിത്രം. തമിഴ്‌നാട്ടിൽ നിന്ന് മാത്രം 75 കോടിയിലധികം രൂപ 'രായൻ' നേടിക്കഴിഞ്ഞു.

ഈ വർഷം ഏറ്റവുമധികം കളക്ഷൻ സ്വന്തമാക്കിയ തമിഴ് ചിത്രം, 150 കോടി ക്ലബ്ബിലിടം നേടുന്ന ആദ്യ എ സർട്ടിഫിക്കറ്റ് തമിഴ് ചിത്രം എന്നീ ഇരട്ട റെക്കോഡുകൾ സ്വന്തമാക്കിയാണ് 'രായന്റെ' കുതിപ്പ്. ധനുഷിന്‍റെ കരിയറിലെ 50-ാമത്തെ ചിത്രമാണിത്. സൺ പിക്ചേഴ്സിന്റെ ബാനറിൽ കലാനിധി മാരനാണ് ചിത്രം നിർമിച്ചിരിക്കുന്നത്. കാളിദാസ് ജയറാമും സുന്ദീപ് കിഷനുമാണ് മറ്റുപ്രധാനവേഷങ്ങളിൽ എത്തിയത്. എ ആർ റഹ്മാനാണ് സം​ഗീത സംവിധാനം. തമിഴിന് പുറമെ ഹിന്ദി ,തെലുങ്ക് ഭാഷകളിലും ചിത്രം റിലീസ് ചെയ്തിട്ടുണ്ട്. ഈ മാസം 30 ന് ആമസോൺ പ്രൈമിലുടെ സ്ട്രീമിങ് ആരംഭിക്കുമെന്നാണ് റിപോർട്ടുകൾ.

ധനുഷിന്റെ സംവിധാനത്തിൽ രണ്ടാമതെത്തിയ ചിത്രമാണ് 'രായൻ'. 2017-ൽ പുറത്തിറങ്ങിയ 'പാ പാണ്ടി'യാണ് ധനുഷ് സംവിധാനം ചെയ്ത ആദ്യചിത്രം. ചിത്രത്തിൽ രാജ്കിരൺ ആയിരുന്നു ടൈറ്റിൽ ക‌ഥാപാത്രമായി എത്തിയത്. ഒപ്പം രേവതി, പ്രസന്ന, ഛായ സിംഗ്, ധനുഷ്, മഡോണ സെബാസ്റ്റ്യൻ, ഗൗതം വാസുദേവ് ​​മേനോൻ, എന്നിവരും പ്രധാന വേഷങ്ങളിൽ എത്തിയിരുന്നു. മലയാളിതാരങ്ങളായ മാത്യു തോമസ്, അനിഖാ സുരേന്ദ്രൻ, പ്രിയാ വാര്യർ എന്നിവർ മുഖ്യവേഷങ്ങളിലെത്തുന്ന 'നിലവുക്ക് എൻമേൽ എന്നടീ കോപം' എന്ന ചിത്രമാണ് അടുത്തതായി ധനുഷിന്റെ സംവിധാനത്തിൽ വരാനിരിക്കുന്നത്. ചിത്രത്തിന് തിരക്കഥ ഒരുക്കിയിരിക്കുന്നതും ധനുഷ് തന്നെയാണ്.