ധനുഷിനിത് നിസ്സാരം; 'സംവിധായകൻ ധനുഷി'നെ കുറിച്ച് വെട്രിമാരൻ

ധനുഷ് സംവിധായകനായതിൽ അത്ഭുതമില്ലെന്ന് വെട്രിമാരൻ. സംവിധായകർക്ക് ചുറ്റും വളർന്ന ധനുഷിന് ഇത് വളരെ സ്വാഭാവികമായ പുരോ​ഗതിയാണെന്നും എന്തും എളുപ്പം പഠിക്കാനുളള മിടുക്ക് ധനുഷിനുണ്ടെന്നും വെട്രിമാരൻ പറഞ്ഞു. പുതിയ തലൈമുറൈ എന്ന തമിഴ് ചാനലിന് നൽകിയ അഭിമുഖത്തിൽ രായൻ എന്ന സിനിമയെ കുറിച്ചുളള അഭിപ്രായം പങ്കുവെക്കുന്നതിനിടെയാണ് ധനുഷിലെ സംവിധായകനെ കുറിച്ച് വെട്രിമാരൻ സംസാരിച്ചത്. ഒപ്പം വട ചെന്നൈ 2 ഉടൻ വരുമെന്നും സൂര്യ നായകനാകുന്ന 'വടിവാസൽ' അണിയറയിൽ പുരോ​ഗമിക്കുകയാണെന്നും വെട്രിമാരൻ വ്യക്തമാക്കി.

'ഒരു നല്ല സംവിധായകന് മാത്രം സാധ്യമാവുന്ന സിനിമയാണ് രായൻ. നടനിൽ നിന്ന് മികച്ച സംവിധായകനിലേക്കുളള ധനുഷിന്റെ വളർച്ചയിൽ എനിക്ക് വലിയ അത്ഭുതമില്ല. കാരണം സംവിധായകർക്ക് ചുറ്റും വളർന്ന ധനുഷിന് ഇത് വളരെ സ്വാഭാവികമായ പുരോ​ഗതിയാണെന്ന് ഞാൻ കരുതുന്നു. ധനുഷിന്റെ അച്ഛനും സഹോദരനും സംവിധായകരാണ്. മാത്രമല്ല, വേഗത്തിൽ പഠിക്കാനുള്ള മിടുക്കും അവനുണ്ട്. അതിനാൽ, അദ്ദേഹം ഒരു സംവിധായകനാകുന്നത് വളരെ സ്വാഭാവികമായ ഒരു കാര്യമാണ്.' -വെട്രിമാരൻ

ധനുഷിന്റെ സംവിധാനത്തിൽ രണ്ടാമതെത്തിയ ചിത്രമാണ് 'രായൻ'. 2017-ൽ പുറത്തിറങ്ങിയ 'പാ പാണ്ടി'യാണ് ധനുഷ് സംവിധാനം ചെയ്ത ആദ്യചിത്രം. ചിത്രത്തിൽ രാജ്കിരൺ ആയിരുന്നു ടൈറ്റിൽ ക‌ഥാപാത്രമായി എത്തിയത്. ഒപ്പം രേവതി, പ്രസന്ന, ഛായ സിംഗ്, ധനുഷ്, മഡോണ സെബാസ്റ്റ്യൻ, ഗൗതം വാസുദേവ് ​​മേനോൻ, എന്നിവരും പ്രധാന വേഷങ്ങളിൽ എത്തിയിരുന്നു. മലയാളിതാരങ്ങളായ മാത്യു തോമസ്, അനിഖാ സുരേന്ദ്രൻ, പ്രിയാ വാര്യർ എന്നിവർ മുഖ്യവേഷങ്ങളിലെത്തുന്ന 'നിലവുക്ക് എൻമേൽ എന്നടീ കോപം' എന്ന ചിത്രമാണ് അടുത്തതായി ധനുഷിന്റെ സംവിധാനത്തിൽ വരാനിരിക്കുന്നത്. ചിത്രത്തിന് തിരക്കഥ ഒരുക്കിയിരിക്കുന്നതും ധനുഷ് തന്നെയാണ്.