മേളയുടെ ആറാം ദിനത്തിൽ 66 ചിത്രങ്ങൾ; നൻപകൽ നേരത്ത് മയക്കത്തിന്റെ അവസാന പ്രദർശനം
ലിജോ ജോസ് പെല്ലിശ്ശേരിയുടെ മത്സര ചിത്രം നൻപകൽ നേരത്തു മയക്കത്തിന്റെ അവസാന പ്രദർശനമടക്കം 66 ചിത്രങ്ങളാണ് രാജ്യാന്തര ചലച്ചിത്രമേളയിൽ ഇന്ന് പ്രദർശനത്തിനുള്ളത്. ഇന്ത്യയുടെ ഓസ്കാർ പ്രതീക്ഷയായ ചെല്ലോ ഷോ, ബ്രസീലിയൻ ചിത്രം കോർഡിയലി യുവേഴ്‌സ്, 99 മൂൺസ്, സ്പാനിഷ് ചിത്രം പ്രിസൺ 77, മഹേഷ് നാരായണൻ ചിത്രം അറിയിപ്പ്, ഫിറാസ് ഖൗരിയുടെ ടുണീഷ്യൻ ചിത്രം ആലം, അവർ ഹോം തുടങ്ങിയവയുടെ അവസാന പ്രദർശനവും ഇന്നു തന്നെ. മേളയുടെ ഉദ്‌ഘാടന ചിത്രമായിരുന്ന ദാര്‍ദന്‍ ബ്രദേഴ്‌സ്‌ ചിത്രം ടോറി ആൻഡ് ലോകിതയുടെയും അവസാന പ്രദർശനം ഇന്നാണ്.
ലൈംഗികത, അക്രമം തുടങ്ങിയ വിഷയങ്ങളെ ആസ്പദമാക്കി അലഹാന്ദ്രോ ജോഡ്രോവ്സ്കി സംവിധാനം ചെയ്ത സ്പാനിഷ് ചിത്രം ദി ഹോളി മൗണ്ടെന്റെ ഏക പ്രദർശനവും ഇന്നുണ്ട്. 1973 ൽ പുറത്തിറങ്ങിയ ചിത്രം സർറിയൽ സിനിമ വിഭാഗത്തിലാണ് ഉൾപ്പെടുത്തിയിരിക്കുന്നത്. ജൂറി ഫിലിംസിൽ പ്രദർശിപ്പിക്കുന്ന വീറ്റ് ഹെൽമർ ചിത്രം ദ ബ്രായുടെ അവസാന പ്രദർശനവും ഇന്നുണ്ടാകും.
ജി എസ് പണിക്കറിനു പ്രണാമം അർപ്പിച്ച് ഏകാകിനിയുടെ പ്രദർശനം നിളയിൽ 5:45നുണ്ടാകും. സനൽ കുമാർ ചിത്രം വഴക്ക്, സിദ്ധാർഥ് ശിവ സംവിധാനം ചെയ്ത ആണ്, ഭർത്താവും ഭാര്യയും മരിച്ച രണ്ടു മക്കളും എന്നീ ചിത്രങ്ങൾ ഉൾപ്പെടെ ഒൻപത് മലയാള ചിത്രങ്ങളും ഇന്ന് പ്രദർശനത്തിനുണ്ട്. മിക്ക ചിത്രങ്ങളുടെയും അവസാനഘട്ട പ്രദർശനങ്ങളായതോടെ തീയേറ്ററുകളിലെല്ലാം വലിയ തിരക്കാണ്. ആദ്യ ദിനം മുതലുള്ള തിരക്ക് അഞ്ചുദിവസവും തുടർന്നു എന്നുള്ളതാണ് ഇക്കുറി മേളയെ വ്യത്യസ്തമാക്കുന്നത്
