ഇടവേളക്ക് ശേഷം അഭിനയരംഗത്തേക്ക് അൽഫോൺസ് പുത്രൻ; സന്തോഷം പങ്കുവെച്ച് അരുൺ വൈഗ
ഇടവേളക്ക് ശേഷം സംവിധായകൻ അൽഫോൺസ് പുത്രൻ അഭിനയരംഗത്തേക്ക് എത്തുന്നു. സംവിധായകൻ അരുൺ വൈഗ സംവിധാനം ചെയ്യുന്ന പുതിയ ചിത്രത്തിലൂടെയാണ് അൽഫോൺസ് പുത്രൻ വീണ്ടും അഭിനയരംഗത്തേക്ക് എത്തുന്നത്.
നേരത്തെ അൽഫോൺസ് പുത്രൻ സംവിധാനം ചെയ്ത പ്രേമം, നേരം, ഗോൾഡ് എന്നീ ചിത്രങ്ങളിൽ അൽഫോൺസ് പുത്രൻ അഭിനയിച്ചിരുന്നു. അരുൺ തന്നെയാണ് അൽഫോൺസ് തന്റെ ചിത്രത്തിലൂടെ അഭിനേതാവ് ആകുന്നതായി പ്രഖ്യാപിച്ചത്.
എഡിറ്റിങ് കൊണ്ടും ഡയറക്ഷൻ കൊണ്ടും അത്ഭുതപ്പെടുത്തിയ മനുഷ്യനാണ് അൽഫോൺസ് പുത്രൻ എന്നും നിരന്തരമായ എന്റെ ശ്രമത്തിന്റെ ഫലമായിട്ടാണ് തന്റെ പടത്തിൽ അൽഫോൺസ് അഭിനയിക്കാൻ എത്തിയതെന്നും അരുൺ സോഷ്യൽ മീഡിയയിൽ എഴുതിയ കുറിപ്പിൽ പറഞ്ഞു.
ഒരുപാട് നാൾ അറിയാവുന്ന ഒരു സുഹൃത്തിനെ പോലെ, ഒരു അനിയനെ പോലെയാണ് അദ്ദേഹം എന്നോട് പെരുമാറിയത്. സിനിമയുടെ ഒരുപാട് അനുഭവങ്ങൾ, പുതിയ പുതിയ കാര്യങ്ങൾ അങ്ങനെ കുറെ ഞങ്ങൾ സംസാരിച്ചുവെന്നും അരുൺ വൈഗ സോഷ്യൽ മീഡിയയിൽ കുറിച്ചു.
ഗോളം എന്ന ചിത്രത്തിന് ശേഷം രഞ്ജിത്ത് സജീവ് നായകനാവുന്ന ചിത്രം കൂടിയാണിത്. ചിത്രത്തിൽ ജോണി ആന്റണി, ഇന്ദ്രൻസ്, മഞ്ജു പിള്ള, സംഗീത എന്നിവരാണ് മറ്റുപ്രധാന കഥാപാത്രങ്ങളായി എത്തുന്നത്.
അരുൺ വൈഗ സംവിധാനം ചെയ്യുന്ന ചിത്രത്തിന്റെ ഛായാഗ്രഹണം നിർവ്വഹിച്ചിരിക്കുന്നത് സിനോജ് പി അയ്യപ്പനും സംവിധായകൻ അരുൺ വൈഗയും ചേർന്നാണ്. രാജേഷ് മുരുകേശനാണ് സംഗീതം ഒരുക്കുന്നത്.
