റോഷനും ഷൈനും ബാലുവും; 'മഹാറാണി' യുടെ ടൈറ്റില്‍ കാർഡ്
റോഷന്‍ മാത്യു, ഷൈന്‍ ടോം ചാക്കോ, ബാലു വർഗീസ് എന്നിവർ കേന്ദ്രകഥാപാത്രങ്ങളായെത്തുന്ന ചിത്രം 'മഹാറാണി'യുടെ ടൈറ്റില്‍ കാർഡ് പുറത്തിറങ്ങി. ചിത്രത്തിന്റെ പൂജയും സ്വിച്ച് ഓൺ കർമവും കൊച്ചിയില്‍ നടന്നു. ജി മാർത്താണ്ഡനാണ് സംവിധാനം. ചിത്രീകരണം ഒക്ടോബറില്‍ തുടങ്ങും. കോമഡി എന്റർടെയ്‌നറായാണ് 'മഹാറാണി'യൊരുങ്ങുന്നത്.
ഹരിശ്രീ അശോകന്‍, ജോണി ആന്റണി, ജാഫര്‍ ഇടുക്കി, സുജിത് ബാലന്‍, കൈലാഷ്, ഗോകുലന്‍, അശ്വത് ലാല്‍ എന്നിവരും പ്രധാന വേഷങ്ങളിലെത്തുന്നു. 'ഇഷ്‌ക് സിനിമയുടെ തിരക്കഥാകൃത്ത് രതീഷ് രവിയാണ് കഥ, തിരക്കഥ,സംഭാഷണമൊരുക്കുന്നത്. സുജിത് ബാലനാണ് നിർമാണം. മുരുകന്‍ കാട്ടാക്കടയുടെയും, അന്‍വര്‍ അലിയുടെയും, രാജീവ് ആലുങ്കലിന്റെയും വരികള്‍ക്ക് സംഗീതമൊരുക്കുന്നത് ഗോവിന്ദ് വസന്തയാണ്. ലോകനാഥനാണ് ഛായാഗ്രഹണം. നൗഫൽ അബ്ദുള്ള എഡിറ്റും ജിത്തു പയ്യന്നൂർ കലാസംവിധാനവും നിർവഹിക്കും.
നാല് വർഷങ്ങൾക്ക് ശേഷമാണ് ജി മാർത്താണ്ഡൻ പുതിയ സിനിമ പ്രഖ്യാപിക്കുന്നത് . 'ദൈവത്തിന്റെ സ്വന്തം ക്ലീറ്റസ്', 'അച്ചാ ദിൻ', 'പാവാട', 'ജോണി ജോണി യെസ് പപ്പ' തുടങ്ങിയവയാണ് മാർത്താണ്ഡന്‍ സംവിധാനം ചെയ്ത മറ്റ് ചിത്രങ്ങള്‍.
