IFFK 2023|കലയെ കലയായി മാത്രം കാണാനാകണമെന്ന് ക്രിസ്റ്റോഫ് സനൂസി

യാഥാർഥ്യങ്ങളെ മറച്ചുപിടിക്കുന്നതാണ് രാഷ്ട്രീയപക്ഷം ചേർന്നുള്ള സിനിമകളെന്ന് പോളിഷ് സംവിധായകൻ ക്രിസ്റ്റോഫ് സനൂസി. കലയെ കലയായി മാത്രം കാണാനാകണമെന്നും അദ്ദേഹം പറഞ്ഞു. ഷേക്സ്പിയറിന്റെ എഴുത്തുകളിൽ രാഷ്ട്രീയം കാണാൻ കഴിയില്ല. അതിനു പരിശ്രമിച്ചാൽ ക്രിയാത്മകതയോടുള്ള ദ്രോഹമാണെന്നും 28-ാമത് കേരളാ രാജ്യാന്തര ചലച്ചിത്ര മേളയുടെ ഭാഗമായി നടന്ന 'ഇൻ കോൺവെർസേഷൻ' എന്ന സെഷനിൽ സനൂസി പ്രതികരിച്ചു.

വ്യക്തിപരമായ നേട്ടങ്ങൾക്ക് വേണ്ടി ആദർശങ്ങളെ വളച്ചൊടിക്കരുതെന്ന് സനൂസി പറഞ്ഞു. ജീവിതാദർശങ്ങൾ നടപ്പാക്കിയതിന് ശേഷമേ അതിനെ കുറിച്ച് സംസാരിക്കാവൂ. താത്കാലികമായ ബുദ്ധിമുട്ടുകളിൽ നിരാശപ്പെട്ട് ചലച്ചിത്ര രംഗത്തെ ചെറുപ്പക്കാർ ആ രംഗം ഉപേക്ഷിക്കരുതെന്നും സ്വപ്നങ്ങൾ തേടിയുള്ള യാത്രയിൽ ഉണ്ടാകുന്ന പ്രതിസന്ധികൾക്ക് ശേഷം നല്ല കാലമുണ്ടാകുമെന്നും സനൂസി അഭിപ്രായപ്പെട്ടു. സി എസ് വെങ്കിടേശ്വരനായിരുന്നു സെഷന്റെ മോഡറേറ്റർ.

ഐഎഫ്എഫ്‌കെയിലെ ലൈഫ്ടൈം അച്ചീവ്മെന്റ് അവാർഡ് ജേതാവാണ് വിഖ്യാത പോളിഷ് സംവിധായകനും നിർമ്മാതാവും തിരക്കഥാകൃത്തുമായ ക്രിസ്റ്റോഫ് സനൂസി.