'റെനെർവേഷൻസിൽ' ജെറിമി റന്നറിനോടൊപ്പം അനില്‍ കപൂര്‍
ജെറിമി റെന്നറിനോടൊപ്പം ഹോളിവുഡില്‍ തിരിച്ചെത്താന്‍ ഒരുങ്ങുകയാണ് ബോളിവുഡ് താരം അനില്‍ കപൂര്‍. മാര്‍വല്‍ സിനിമാറ്റിക് യൂണിവേഴ്‌സിലൂടെ ഇന്ത്യക്കാര്‍ക്കും പ്രിയങ്കരനായി തീര്‍ന്ന ജെറിമി റെന്നറിന്റെ പുതിയ പരമ്പര 'റെനെര്‍വേഷന്‍സിലാ'ണ് അനില്‍ കപൂര്‍ അഭിനയിക്കുന്നത്. അനില്‍ കപൂര്‍ തന്നെയാണ് ട്വിറ്ററിലൂടെ വിവരം പങ്കുവെച്ചത്.
''അനില്‍ കപൂര്‍ എന്ന നടൻ അടുത്തതായി എന്തു ചെയ്യാൻ പോകുന്നു എന്നറിയാൻ ആഗ്രഹമുണ്ടെന്ന സംവിധായകന്‍ ശേഖര്‍ കപൂറിന്റെ ചോദ്യത്തിനുള്ള മറുപടിയായിരുന്നു ട്വിറ്റര്‍ കുറിപ്പ്.
ഡിസ്‌നിക്കായി ജെറിമി റെന്നറിനോടൊപ്പമുള്ള റെനെര്‍വേഷസിനായി കാത്തിരിക്കുകയാണെന്നായിരുന്നു അനില്‍ കപൂറിന്റെ മറുപടി
ഓസ്‌കര്‍ നേടിയ സ്ലംഡോഗ് മില്ല്യണര്‍, 24 എന്നീ ഹോളിവുഡ് ചിത്രങ്ങളിലാണ് അനില്‍ കപൂര്‍ അഭിനയിച്ചിട്ടുള്ളത്. ഹോളിവുഡ് സൂപ്പര്‍സ്റ്റാര്‍ ടോം ക്രൂസിന്റെ 'മിഷന്‍ ഇംപോസിബിള്‍ ഗോസ്റ്റ് പ്രോട്ടോക്കോളില്‍' അനില്‍ കപൂറും ജെറിമി റെന്നറും ഭാഗമായിരുന്നു. എന്നാല്‍ റെനെര്‍വേഷൻസിലൂടെ ഇരുവരും സ്‌ക്രീനിന് മുമ്പില്‍ ഒരുമിച്ച് അഭിനയിക്കുന്നു സീരിസിന്റെ മറ്റൊരു പ്രത്യേകത.
മാര്‍വല്‍ സിനിമാറ്റിക് യൂണിവേഴ്‌സില്‍ 'ഹോക്കൈ' എന്ന സൂപ്പര്‍ഹീറോയെയാണ് ജെറിമി റെന്നര്‍ അവതരിപ്പിക്കുന്നത്. രാജസ്ഥാനിലെ ആല്‍വാറില്‍ ഇരുവരും ഒരുമിച്ച് പ്രത്യക്ഷപ്പെട്ടത് മുതല്‍ അനില്‍ കപൂര്‍ റെനെര്‍വേഷന്‍സിന്റെ ഭാഗമായേക്കാം എന്ന റിപ്പോര്‍ട്ടുകള്‍ പ്രചരിച്ചിരുന്നു. മഞ്ഞ് നീക്കം ചെയ്യുന്നതിനിടെ റെന്നറിന് പരിക്കേറ്റപ്പോള്‍ താരത്തിനോടൊപ്പമുള്ള ചിത്രം പങ്കുവെച്ച് അനില്‍ കപൂര്‍ ട്വീറ്റ് ചെയ്തതും അഭ്യൂഹങ്ങള്‍ക്ക് ആക്കം കൂട്ടി. നിങ്ങള്‍ക്ക് വേഗം സുഖം പ്രാപിക്കട്ടെ എന്നായിരുന്നു ട്വീറ്റ്.
ഇന്ത്യന്‍ മാര്‍ക്കറ്റ് ലക്ഷ്യമിട്ട് ഹോളിവുഡ് സീരീസുകളിലും സിനിമകളിലും ഇന്ത്യന്‍ താരങ്ങളെ ഉള്‍പ്പെടുത്തുന്നത് ട്രെന്‍ഡായി മാറിയിരിക്കുകയാണ്. അനില്‍ കപൂറിന്റെ റെനെര്‍വേഷൻസിലെ കഥാപാത്രത്തിനായി കാത്തിരിക്കുകയാണ് ആരാധകര്‍.
