പൊന്നോണ താളമായി യേശുദാസിന്റെ ഓണപ്പാട്ട്
ഓണക്കാലം കൂടുതൽ കളറാക്കാൻ മനോഹര ഗാനവുമായി ഗായകൻ കെ ജെ യേശുദാസ്. പൊന്നോണ താളം എന്ന പേരിൽ പുറത്തിറങ്ങിയ ഗാനം മലയാളികളുടെ പ്രിയ ഗായിക ശ്വേത മോഹനും ചേർന്നാണ് ആലപിച്ചിരിക്കുന്നത്. ശ്രീകുമാരൻ തമ്പിയുടെ വരികൾക്ക് സൽഗിൻ കളപ്പുരയാണ് സംഗീതം നൽകിയിരിക്കുന്നത്. യേശുദാസിന്റെ സംഗീത കമ്പനിയായ തരംഗിണി റെക്കോർഡ്സ്, ഹിറ്റ് 96.7 എഫ്എമ്മുമായി ചേർന്നാണ് ഗാനം റിലീസ് ചെയ്തത്.
തരംഗിണിയുടെ യൂട്യൂബ് ചാനലിലൂടെയാണ് ഗാനം പുറത്തിറക്കിയത്. ഓണക്കാലത്തെ ഓർമിപ്പിക്കുന്ന ദൃശ്യങ്ങൾക്കൊപ്പം യേശുദാസിന്റെയും ശ്വേതയുടെയും മനോഹര ശബ്ദവും ചേർന്നപ്പോൾ പ്രേക്ഷകർക്ക് ദൃശ്യവിരുന്നായി മാറിയിരിക്കുകയാണ് പൊന്നോണ താളം.
"തോണിപ്പാട്ടിന്റെ ഈണ ലഹരിയിൽ പമ്പയൊഴുകുന്നു
വഞ്ചിപ്പാട്ടുകളേറ്റു പാടുന്നു കരയിൽ മാമരങ്ങൾ
ഹൃദയം പാടുന്ന വേളകൾ
നിറങ്ങൾ കലരുന്ന വേദികൾ"
ശ്രീകുമാരൻ തമ്പിയുടെ ഓണക്കാല ഓർമകൾ തുളുമ്പുന്ന വരികൾക്കൊപ്പം സൽഗിൻ കളപ്പുരയുടെ സംഗീതവും ചേർന്നപ്പോൾ കൂടുതൽ ആസ്വാദ്യകരമാവുകയാണ് പൊന്നോണ താളം.
