ഉലകനായകന് പിറന്നാള്‍ സമ്മാനം; തഗ് ലൈഫ് റിലീസ് തീയതി പ്രഖ്യാപിച്ചു
കമല്‍ഹാസനെ കേന്ദ്ര കഥാപാത്രമാക്കി മണിരത്നം സംവിധാനം ചെയ്യുന്ന തഗ് ലൈഫ് എന്ന ചിത്രത്തിന്റെ റിലീസ് തീയതി പ്രഖ്യാപിച്ചു. കമല്‍ഹാസന്റെ ജന്മദിനത്തോട് അനുബന്ധിച്ചാണ് അണിയറ പ്രവർത്തകർ റിലീസ് ടീസർ പുറത്തുവിട്ടിരിക്കുന്നത്. 2025 ജൂണ്‍ അഞ്ചിനായിരിക്കും ചിത്രം തിയേറ്ററുകളിലെത്തുക.
വലിയ ക്യാൻവാസില്‍ ഒരുക്കുന്ന ചിത്രത്തിന്റെ ടീസറില്‍ ആക്ഷൻ രംഗങ്ങളുള്‍പ്പെടെയുണ്ട്. ചിത്രത്തില്‍ മറ്റൊരു പ്രധാന കഥാപാത്രത്തെ അവതരിപ്പിക്കുന്ന ചിമ്പുവിനേയും കാണാം. രണ്ട് ലുക്കില്‍ കമല്‍ഹാസൻ എത്തുന്നതായാണ് ടീസർ വ്യക്തമാക്കുന്നത്.
സെപ്റ്റംബർ അവസാനത്തോടെയാണ് തഗ് ലൈഫിന്റെ ചിത്രീകരണം പൂർത്തിയായത്. നീണ്ട 37 വര്‍ഷങ്ങള്‍ക്കിപ്പുറം കമൽഹാസനും മണിരത്നവും ഒന്നിക്കുന്നു എന്ന പ്രത്യേകതയും തഗ് ലൈഫിനുണ്ട്. എ ആർ റഹ്മാനാണ് ചിത്രത്തിന് സംഗീതം ഒരുക്കിയിരിക്കുന്നത്. ജോജു ജോർജ്, തൃഷ, അഭിരാമി,ഐശ്വര്യ ലക്ഷ്മി, നാസർ തുടങ്ങിയവരും താരനിരയിലുണ്ട്.
കമല്‍ ഹാസന്റെ രാജ്കമല്‍ ഫിലിംസിനൊപ്പം മണി രത്നത്തിന്‍റെ മദ്രാസ് ടാക്കീസും ഉദയനിധി സ്റ്റാലിന്‍റെ റെഡ് ജയന്‍റ് മൂവീസും ചേര്‍ന്നാണ് ചിത്രം നിര്‍മിക്കുന്നത്. രംഗരായ ശക്തിവേല്‍ നായ്ക്കര്‍ എന്നാണ് ചിത്രത്തില്‍ കമല്‍ ഹാസന്‍ അവതരിപ്പിക്കുന്ന കഥാപാത്രത്തിന്‍റെ പേര്
രവി കെ ചന്ദ്രന്‍ ആണ് തഗ് ലൈഫിന്റെ ഛായാഗ്രാഹകന്‍. അശോക് സെല്‍വന്‍, അലി ഫസല്‍, പങ്കജ് ത്രിപാഠി, ജിഷു സെന്‍ഗുപ്ത, സാന്യ മല്‍ഹോത്ര, രോഹിത് ഷറഫ്, വൈയാപുരി എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്.പി ആർ ഓ പ്രതീഷ് ശേഖർ.
