പൃഥ്വിരാജിന്റെ സിനിമയില്‍ ശിവരാജ്കുമാറെത്തുന്നു ; വൈറലായി വീഡിയോ
രജനീകാന്ത് നായകനായെത്തിയ പുതിയ ചിത്രം ജയ്ലർ വലിയ പ്രശംസയാണ് പിടിച്ചു പറ്റിയത്. രജനീകാന്തിനൊപ്പം അതിഥി വേഷത്തിലെത്തി മലയാളം സൂപ്പർ താരം മോഹൻലാലും കന്നഡ താരം ശിവരാജ് കുമാറും കൈയ്യടി നേടിയിട്ടുണ്ട്. രജനീകാന്തിനൊപ്പം മാസാവുകയാണ് ഇരുവരും . എന്നാൽ കന്നഡ താരം മലയാളത്തിലേക്കെത്തുന്നു എന്ന വാർത്തകളും പുറത്തു വന്നിരുന്നു.
പൃഥിരാജിന്റെ പുതിയ ചിത്രത്തിൽ ശിവരാജ്കുമാറുമുണ്ടാകുമെന്നായിരുന്നു റിപ്പോർട്ടുകൾ. എന്നാലിപ്പോൾ ഈ കാര്യത്തിൽ വ്യക്തത വരുത്തിയിരിക്കുകയാണ് താരം. ''എനിക്ക് പ്രിഥ്വിരാജിനെ വലിയ ഇഷ്ടമാണ്. സിനിമയുടെ പേര് അറിയില്ല. എന്നാൽ അത് ഉടനെ സംഭവിക്കും'' എന്നായിരുന്നു താരത്തിന്റെ പ്രതികരണം. ജയ്ലർ സിനിമയുടെ പ്രചാരണത്തിനിടെയാണ് വിമാനത്താവളത്തിൽ മാധ്യമ പ്രവർത്തകരോട് താരം പ്രതികരിച്ചത്.ഈ വീഡിയോയാണ് മാധ്യമങ്ങളില്‍ പ്രചരിക്കുന്നത്.
എമ്പുരാന് ശേഷം പൃഥ്വിരാജ് സുകുമാരൻ സംവിധാനം ചെയ്യുന്ന ചിത്രത്തിലായിരിക്കും കന്നഡ താരമെത്തുക. ചിത്രത്തെ കുറിച്ച് കൂടുതൽ പറയാനാകില്ലെന്നുമായിരുന്നു പ്രതികരണം. ഹോംബാലെ ഫിലീംസിന് വേണ്ടി പ്രിഥ്വിരാജ് സംവിധാനം ചെയ്യുന്ന പാൻ ഇന്ത്യൻ ചിത്രം ടൈസണിലേക്കായിരിക്കും ശിവരാജ്കുമാർ എത്തുകയെന്നാണ് സമൂഹമാധ്യമങ്ങളിലെ ചർച്ച.
കന്നഡയിലെ സൂപ്പര്‍ താരം രാജ്കുമാറിന്റെ മകനാണ് ശിവരാജ്കുമാർ. കന്നഡ ആരാധകർ സ്നേഹത്തോടെ ശിവണ്ണ എന്നാണ് അദ്ദേഹത്തെ അഭിസംബോധന ചെയ്യുന്നത്. . 'ശ്രീ ശ്രീനിവാസ കല്യാണ' എന്ന ചിത്രത്തില്‍ ബാലനടനായിട്ടാണ് ശിവ രാജ്‍കുമാര്‍ സിനിമയിലെത്തിയത്. 2021 ൽ മരിച്ച കന്നഡ സൂപ്പർ താരം പുനീത് രാജ്കുമാറിന്റെ സഹോദരനാണ് ശിവരാജ്കുമാർ.
