ഏറ്റുമുട്ടാനില്ല; ജയിലർ റിലീസ് മാറ്റുന്നു

ധ്യാൻ ശ്രീനിവാസൻ ചിത്രം ജയിലറിന്റെ റിലീസ് മാറ്റിവയ്ക്കുമെന്ന് സൂചന. തമിഴ് ചിത്രം ജയിലർ തീയേറ്ററുകളിലെത്തുന്ന ഓഗസ്റ്റ് പത്തിന് തന്നെ മലയാള ചിത്രവും റിലീസ് ചെയ്യുമെന്നായിരുന്നു പ്രഖ്യാപനം. എന്നാൽ ആവശ്യത്തിന് തീയേറ്ററുകൾ ലഭിക്കാത്ത സാഹചര്യത്തിൽ റിലീസ് മാറ്റിവയ്ക്കാനാണ് നീക്കം. ഇതുസംബന്ധിച്ച ഔദ്യോഗിക പ്രഖ്യാപനം വൈകാതെയുണ്ടാകും

ആദ്യഘട്ടത്തിൽ നൂറിലേറെ തീയേറ്ററുകളുമായി ധാരണയിലെത്തിയെങ്കിലും അവസാന നിമിഷം പലരും കൈയൊഴിഞ്ഞു. കുറഞ്ഞത് 75 സ്ക്രീനുകളെങ്കിലും ലഭിക്കാതെ സാഹചര്യത്തിലാണ് റിലീസ് മാറ്റുന്നത്.

പ്രൊഡ്യൂസേഴ്സ് അസോസിയേഷനും വിതരണക്കാരുടെ സംഘടനയ്ക്കും പരാതി നൽകിയെങ്കിലും നടപടിയുണ്ടായില്ല. തുടർന്ന് ഫിലിം ചേംബറിന് മുന്നിൽ സംവിധായകൻ സക്കീർ മഠത്തിൽ സമരം ചെയ്തെങ്കിലും കൂടുതൽ തീയേറ്ററുകൾ ലഭിച്ചില്ല

രജനികാന്ത്, മോഹൻലാൽ, രമ്യാകൃഷ്ണൻ തുടങ്ങി വൻ താരനിരയിലെത്തുന്ന ബിഗ് ബജറ്റ് ചിത്രം ജയിലർ വലിയ വിജയമാകുമെന്ന പ്രതീക്ഷയിലാണ് തീയേറ്ററുടമകൾ. പ്രീബുക്കിങ്ങിന് ലഭിച്ച പ്രേക്ഷക പ്രതികരണവും ഈ പ്രതീക്ഷ ശരിവയ്ക്കുന്നതാണ്. അതിനാൽ തന്നെ തമിഴ് ചിത്രത്തിന്റെ ഷോ കുറയ്ക്കാനാകില്ലെന്ന നിലപാടിലാണ് ഫിയോക്ക് . കേരളത്തിൽ മാത്രം മുന്നൂറിലധികം തീയേറ്ററുകളിലാണ് തമിഴ് ചിത്രം ജയിലർ റിലീസ് ചെയ്യുക