ഏക്താ കപൂറിന്റെ ബിഗ് ബജറ്റ് ചിത്രത്തിൽ മോഹന്‍ലാൽ; 'വൃഷഭ' ആരംഭിക്കുന്നു
മോഹന്‍ലാല്‍ നായകനാവുന്ന ബിഗ്ബജറ്റ് പാന്‍ ഇന്ത്യന്‍ ചിത്രം വൃഷഭ അടുത്ത മാസം ചിത്രീകരണം ആരംഭിക്കും. ആക്ഷൻ എന്റർടെയ്നർ ജോണറിലൊരുങ്ങുന്ന ചിത്രം മലയാളം -തെലുങ്ക് ഭാഷകളിലായിട്ടായിരിക്കും ഒരുക്കുക. ബാലാജി ടെലിഫിലിംസിന്റെ ബാനറില്‍ ഏക്താ കപൂറാണ് നിർമാണം.
നന്ദ കിഷോറാണ് ചിത്രത്തിന്റെ സംവിധായകൻ. മലയാളം, തെലുഗ്, കന്നഡ, തമിഴ്, ഹിന്ദി ഭാഷകളിൽ ചിത്രം റിലീസിനെത്തും. കഴിഞ്ഞ ദിവസം മുംബൈ വൈആർഎഫ് സ്റ്റുഡിയോസിൽ മോഹൻലാലിനൊപ്പമുള്ള അണിയറ പ്രവർത്തകരുടെ ഫോട്ടോ ഷൂട്ടും നടന്നിരുന്നു.
മോഹന്‍ലാലിനെ പോലെ ഒരു പ്രതിഭയ്ക്കൊപ്പം സിനിമ ചെയ്യാനാകുവെന്നതിൽ വലിയ ആവേശത്തിലാണെന്ന് ഏക്താ കപൂർ ഇൻസ്റ്റഗ്രാമിൽ കുറിച്ചു
തലമുറകളിലൂടെ സഞ്ചരിക്കുന്ന ഒരു എപിക് ആക്ഷന്‍ എന്റര്‍ടെയ്‌നര്‍ ആയിരിക്കും വൃഷഭയെന്നാണ് സിനിമാ അനലിസ്റ്റുകള്‍ വ്യക്തമാക്കുന്നത്. 200 കോടിയാണ് ചിത്രത്തിന്റെ ബജറ്റെന്നാണ് സൂചന.
ലിജോ ജോസ് പെല്ലിശ്ശേരി സംവിധാനം ചെയ്യുന്ന മലൈക്കോട്ടൈ വാലിബന്‍, ജീത്തു ജോസഫിന്റെ റാം, പൃഥ്വിരാജിന്റെ സംവിധാനത്തിലൊരുങ്ങുന്ന എമ്പുരാന്‍ എന്നിവയാണ് മോഹന്‍ലാലിന്റേതായി വരാനിരിക്കുന്ന ചിത്രങ്ങള്‍. അതേസമയം, ബോളിവുഡ് ചിത്രങ്ങളായ ഡ്രീം ഗേള്‍ 2, ദി ക്രൂ എന്നിവയാണ് ഏക്ത കപൂറിന്റെ നിര്‍മ്മാണത്തില്‍ റിലീസിനൊരുങ്ങുന്നത്.
ബാലാജി ടെലിഫിലിംസിന്റെ ബാനറിൽ ഏക്താ കപൂർ മോഹൻലാലുമായി ചെയ്യുന്ന ആദ്യ പാൻ ഇന്ത്യൻ ചിത്രം കൂടിയാകും 'വൃഷഭ
