സെപ്റ്റംബർ 16 ന് മൾട്ടിപ്ലക്സ് സിനിമാ ടിക്കറ്റ് നിരക്ക് വെറും 75 രൂപാ
ദേശീയ സിനിമാ ദിനാഘോഷത്തിന്റെ ഭാഗമായി 75 രൂപാനിരക്കില്‍ ടിക്കറ്റ് ലഭ്യമാക്കാന്‍ മള്‍ട്ടിപ്ലക്‌സ് അസോസിയേഷന്‍ ഓഫ് ഇന്ത്യ(MAI). സെപ്റ്റംബര്‍ 16-ന് പിവിആര്‍, സിനിപോളിസ് ശൃംഖലകളുള്‍പ്പെടെ ഇന്ത്യയിലുടനീളമുള്ള 4,000 സിനിമാ തിയേറ്ററുകളില്‍ ടിക്കറ്റ് നിരക്ക് കുറച്ചുകൊണ്ട് ദേശീയ സിനിമാ ദിനം ആചരിക്കും. ലോക്ക്ഡൗണുകള്‍ക്ക് ശേഷം സിനിമാ-തിയേറ്റര്‍ വ്യവസായത്തെ കരകയറാന്‍ സഹായിച്ച പ്രേക്ഷകരോടുള്ള നന്ദിസൂചകമായാണ് മള്‍ട്ടിപ്ലക്‌സ് അസോസിയേഷന്‍ ഓഫ് ഇന്ത്യയുടെ തീരുമാനം.
നെറ്റ്ഫ്‌ലിക്‌സും, ആമസോണ്‍ പ്രൈമും ഉള്‍പ്പെടെയുള്ള ഓണ്‍ലൈന്‍ പ്ലാറ്റ്‌ഫോമുകളില്‍ നിന്ന് ശക്തമായ മത്സരം തിയേറ്റര്‍ വ്യവസായം നേരിടുന്നുണ്ട്. ടിക്കറ്റ് നിരക്കില്‍ ഇളവ് നല്‍കിക്കൊണ്ട് ആളുകളെ തിയേറ്ററുകളിലേക്ക് മടക്കിക്കൊണ്ടുവരാന്‍ കഴിയുമെന്നാണ് തീയറ്റര്‍ ഉടമകളുടേയും ഓപ്പറേറ്റര്‍മാരുടേയും പ്രതീക്ഷ.
കോവിഡ് കാലത്തിനു ശേഷം ഇന്ത്യന്‍ ചലച്ചിത്ര വ്യവസായം തിരിച്ചുവരവിന്റെ പാതയിലാണെന്നും 2022 ആദ്യപാദത്തിലെ കളക്ഷന്‍ കണക്കുകള്‍ തൃപ്തികരമാണെന്നും മള്‍ട്ടിപ്ലക്‌സ് അസോസിയേഷന്‍ ഓഫ് ഇന്ത്യ വ്യക്തമാക്കി. KFGചാപ്റ്റര്‍ 2, RRR, വിക്രം, ഭൂല്‍ ഭുലയ്യ 2, എന്നിവയും ഹോളിവുഡ് ചിത്രം ഡോക്ടര്‍ സ്ട്രേഞ്ച് ഇന്‍ ദി മള്‍ട്ടിവേഴ്സ് ഓഫ് മാഡ്നെസ് എന്നിവയും മികച്ച കളക്ഷന്‍ നേടിയിരുന്നു.
75 രൂപ ടിക്കറ്റ് നല്‍കുന്ന തിയേറ്ററുകള്‍ സോഷ്യല്‍ മീഡിയ ഹാന്‍ഡില്‍ വഴി വിശദാംശങ്ങള്‍ പ്രേക്ഷകരെ അറിയിക്കണമെന്ന് അസോസിയേഷന്‍ നിര്‍ദേശിച്ചിട്ടുണ്ട്. തിയേറ്ററുകളിൽ നിന്ന് നേരിട്ട് എടുക്കുന്ന ടിക്കറ്റുകൾ മാത്രമാണ് 75 രൂപയ്ക്ക് ലഭിക്കുക. ഓൺലൈൻ വഴിയുള്ള ടിക്കറ്റുകൾക്ക് നിലവിലെ നിരക്ക് തുടരും. ഓണക്കാലത്ത് മലയാളികള്‍ക്കുള്‍പ്പെടെയുള്ള സിനിമാ പ്രേമികൾക്ക് പ്രതീക്ഷ നൽകുന്നതാണ് മള്‍ട്ടിപ്ലക്‌സ് അസോസിയേഷന്‍ ഓഫ് ഇന്ത്യയുടെ തീരുമാനം. എന്നാൽ മൾട്ടിപ്ലക്സുകളല്ലാത്ത സാധാരണ തിയറ്ററുകളിൽ നിരക്കിളവ് ഉണ്ടാവില്ല.
നേരത്തെ അമേരിക്കയും ബ്രിട്ടനും ദേശീയ സിനിമാ ദിനത്തില്‍ ടിക്കറ്റ് നിരക്കില്‍ ഇളവുകള്‍ പ്രഖ്യാപിച്ചിരുന്നു.അമേരിക്കയിൽ സിനിമാ ടിക്കറ്റ് നിരക്ക് 7 ഡോളറില്‍ നിന്ന് 3ഡോളറാക്കി കുറച്ചിരുന്നു. എന്നാൽ ദേശിയ സിനിമാദിനത്തിന്റെ ഭാഗമായി നിരക്കുകൾ കുറയ്ക്കാനുള്ള തീരുമാനം തമിഴ്നാട്ടിൽ നടപ്പിലാകാനിടയില്ല.
