പ്രേക്ഷകരെ പൊട്ടിച്ചിരിപ്പിച്ച് ന്റിക്കാക്കാക്കൊരു പ്രേമണ്ടാർന്ന് മേക്കിങ്ങ് വീഡിയോ
തീയേറ്ററുകളില്‍ വിജയകരമായി പ്രദർശനം തുടരുന്ന ഭാവന- ഷറഫുദീൻ ചിത്രം ന്റിക്കാക്കാക്കൊരു പ്രേമണ്ടാർന്ന് മേക്കിങ്ങ് വീഡിയോ പുറത്തു വിട്ട് അണിയറ പ്രവർത്തകർ. ഷൂട്ടിങ്ങിനിടയിലെ രസകരമായ നിമിഷങ്ങളും അബദ്ധങ്ങളുമൊക്കെയാണ് വീഡിയോയിലുള്ളത് .
നീണ്ട ഇടവേളയ്ക്ക് ശേഷം ഭാവന മലയാളത്തില്‍ തിരിച്ചെത്തിയ ചിത്രമാണ് 'ന്റിക്കാക്കാക്കൊരു പ്രേമണ്ടാര്‍ന്ന്'. ചിത്രത്തേയും ഭാവനയേയും മലയാളികള്‍ ഇരു കൈകളും നീട്ടി സ്വീകരിച്ചു. നവാഗതനായ ആദില്‍ മൈമൂനത്ത് അഷറഫാണ് ചിത്രത്തിന്റെ സംവിധാനം. ഭാവന, ഷറഫുദ്ദീന്‍, അശോകന്‍, അനാര്‍ക്കലി നാസര്‍, ഷെബിന്‍ ബെന്‍ സണ്‍, അഫ്‌സാന ലക്ഷ്മി തുടങ്ങിയവരാണ് ചിത്രത്തില്‍ പ്രധാന വേഷങ്ങളിലെത്തുന്നത്.
പ്രണയത്തെക്കുറിച്ചും കുടുംബ ബന്ധങ്ങളെ കുറിച്ചും സംസാരിക്കുന്ന ഒരു ഫീല്‍ ഗുഡ് കോമഡി എന്‍റര്‍ടെയ്നര്‍ ആണ് ചിത്രം. ബോണ്‍ഹോമി എന്റെര്‍ടൈന്‍മെന്റ്‌സിന്റെ ബാനറില്‍ ലണ്ടന്‍ ടാക്കീസുമായി ചേര്‍ന്ന് റെനിഷ് അബ്ദുള്‍ഖാദര്‍, രാജേഷ് കൃഷ്ണ എന്നിവരാണ് ചിത്രം നിര്‍മ്മിച്ചിരിക്കുന്നത്. ആദില്‍ മൈമൂനത്ത് തന്നെയാണ് ചിത്രത്തിന്റെ രചനയും, എഡിറ്റിങും. അരുണ്‍ റഷ്ദിയാണ് ചിത്രത്തിന്റെ ക്യാമറ കൈകാര്യം ചെയ്തിരിക്കുന്നത്. വിനായക് ശശികുമാറിന്റെ വരികള്‍ക്ക് പോള്‍ മാത്യു, നിശാന്ത് രാംടെകെ, ജോക്കര്‍ ബ്ലൂസ് എന്നിവര്‍ സംഗീതം നല്‍കിയിരിക്കുന്നു.
