രണ്ട് പതിറ്റാണ്ടിന് ശേഷം റീ റിലീസ് ചെയ്ത് 'ഗുഡുംബ ശങ്കർ'; സിനിമാ ജീവിതത്തിലെ വഴിത്തിരിവായ ചിത്രമെന്ന് മീരാ ജാസ്മിൻ
മീര ജാസ്മിനും പവൻ കല്യാണും പ്രധാന വേഷത്തിലെത്തിയ തെലുങ്ക് ചിത്രം 'ഗുഡുംബ ശങ്കർ' റീ റിലീസിനൊരുങ്ങുന്നു. പവൻ കല്യാണിന്റെ ജന്മദിനത്തോടനുബന്ധിച്ചാണ് ചിത്രം ഇന്ന് തിയേറ്ററുകളിലെത്തിയത്. സെപ്റ്റംബർ രണ്ടിനാണ് പവൻ കല്യാണിന്റെ പിറന്നാൾ. തന്റെ ഇൻസ്റ്റഗ്രാം പേജിലൂടെയാണ് മീര ജാസ്മിനാണ് വിവരം പങ്കുവെച്ചത്.
സിനിമാ ജീവിതത്തിലെ പ്രധാന വഴിത്തിരിവും വഴികാട്ടിയുമായ ചിത്രമാണ് തനിക്ക് 'ഗുഡുംബ ശങ്കർ' എന്ന് മീരാ ജാസ്മിൻ ഇൻസ്റ്റാ പോസ്റ്റിൽ പറയുന്നു. പഴയ ലൊക്കേഷൻ ചിത്രങ്ങളും പോസ്റ്റിൽ ഉൾപ്പെടുത്തിയിട്ടുണ്ട്. ദയയും സഹാനുഭൂതിയും അനുകമ്പയും നിറഞ്ഞ പവൻ കല്യാണിന്റെ പെരുമാറ്റവും തുറന്ന കാഴ്ചപ്പാടും തന്റെ ജീവിതത്തിലെ പ്രതിസന്ധി ഘട്ടങ്ങളിൽ ആശ്വാസമായിട്ടുണ്ടെന്നും മീര ജാസ്മിൻ കുറിച്ചു. ഈ ഓർമകൾ പങ്കുവയ്ക്കാനായതിൽ സന്തോഷമെന്നും കുറിപ്പിൽ പറയുന്നു.
'ഗുഡുംബ ശങ്കറി'ന്റെ മുഴുവൻ അണിയറപ്രവർത്തകർക്കും ആശംസ അറിയിച്ചുകൊണ്ടുളളതാണ് മീരയുടെ പോസ്റ്റ്. 2004-ലായിരുന്നു 'ഗുഡുംബ ശങ്കർ' റിലീസ് ചെയ്തത്. പ്രിയതാരത്തിന്റെ ജന്മദിനം ആഘോഷമാക്കുകയാണ് ചിത്രത്തിന്റെ അണിയറപ്രവർത്തകരും പവൻ കല്യാൺ ആരാധകരും. വീരശങ്കർ ബൈരിസെട്ടിയുടെ സംവിധാനത്തിൽ നാഗേന്ദ്ര ബാബു ആയിരുന്നു ചിത്രം നിർമിച്ചത്. പവൻ കല്യാണിന്റേത് തന്നെയായിരുന്നു തിരക്കഥ.
