നല്ലവനായ കൊള്ളക്കാരൻ; രാമചന്ദ്ര ബോസും കൂട്ടരുമെത്തി

നിവിൻ പോളി നായകനാകുന്ന 'രാമചന്ദ്ര ബോസ് ആന്റ് കോ'യുടെ ടീസ‍ർ പുറത്ത്. തുറമുഖത്തിന് ശേഷം നിവിൻ പോളി നായകനാകുന്ന ചിത്രത്തിന്റെ സംവിധാനം ഹനീഫ് അദേനിയാണ്. ചിത്രം ഓണം റിലീസായെത്തുമെന്ന് അറിയിച്ചിട്ടുണ്ടെങ്കിലും തീയതി പ്രഖ്യാപിച്ചിട്ടില്ല.

ചിത്രത്തിന്റെ ടീസർ പുറത്തിറങ്ങിയ വിവരം നിവിൻ ഫേസ്ബുക്കിലൂടെയാണ് പങ്കുവച്ചത്. "ബോസും സ്ക്വാഡും ഒത്തുകൂടി" എന്ന കുറിപ്പോടെയായിരുന്നു ഫേസ്ബുക്ക് പോസ്റ്റ്. തമാശകൾ നിറച്ച ഒരു കൊളളയുടെ കഥയാണ് ചിത്രം പറയുന്നത്. നല്ലവനായ കൊള്ളക്കാരൻ രാമചന്ദ്ര ബോസായാണ് നിവിൻ ചിത്രത്തിലെത്തുന്നത്. കൂട്ടാളികളുമൊത്ത് നടത്തുന്ന ഒരു പ്രവാസി കവർച്ചയാണ് ചിത്രത്തിന്റെ പ്രമേയം. യുഎഇയിലും കേരളത്തിലുമായാണ് ചിത്രത്തിൻ്റെ ഷൂട്ടിങ് നടന്നത്.

സംവിധായകൻ ഹനീഫ് അദേനി തന്നെയാണ് ചിത്രത്തിന്റ തിരക്കഥയും ഒരുക്കിയിരിക്കുന്നത്. ജാഫർ ഇടുക്കി, വിനയ് ഫോർട്ട്, മമിത, തുടങ്ങിയവരാണ് മറ്റ് പ്രധാന താരങ്ങൾ. ലിസ്റ്റിൻ സ്റ്റീഫന്റെ മാജിക് ഫ്രെയിംസിനൊപ്പം നിവിൻ പോളിയുടെ പോളി ജൂനിയർ പിക്ചേഴ്‌സും ചേർന്നാണ് നിർമാണം. വിഷ്‍ണു തണ്ടാശേരിയാണ് ഛായാഗ്രാഹണം. മിഥുൻ മുകുന്ദനാണ് ചിത്രത്തിന്റെ സംഗീതം.