പ്രേക്ഷകര്‍ ഏറെ ആകാംഷയോടെ കാത്തിരിക്കുന്ന മമ്മൂട്ടിയുടെ 'റോഷാക്ക് 'ന്റെ ചിത്രീകരണം ദുബായില്‍ പൂര്‍ത്തിയായി. പാക്കപ്പ് ചെയ്ത കാര്യം മമ്മൂട്ടി തന്നെയാണ് സോഷ്യല്‍ മീഡിയയിലൂടെ പങ്കുവച്ചത്. നിസാം ബഷീര്‍ സംവിധാനം ചെയ്യുന്ന ചിത്രം മമ്മൂട്ടി കമ്പനി തന്നെയാണ് നിര്‍മ്മിക്കുന്നത്.
കഥാപാത്രത്തെ പരിചയപ്പെടുത്തുന്ന മമ്മൂട്ടിയുടെ മുഖം മൂടി ധരിച്ച ഫസ്റ്റ് ലുക്ക് പോസ്റ്റര്‍ നേരത്തെ സോഷ്യല്‍ മീഡിയയില്‍ വലിയ ചര്‍ച്ചയായിരുന്നു. ത്രില്ലര്‍ ഗണത്തില്‍പ്പെടുന്ന ചിത്രമാകും റോഷാക്ക് എന്നാണ് സൂചന . ചിത്രത്തെ കുറിച്ചുള്ള കൂടുതല്‍ വിവരങ്ങള്‍ പുറത്തുവിടാന്‍ അണിയറ പ്രവര്‍ത്തകര്‍ തയാറായിട്ടില്ല . കെട്ട്യോളാണെന്റെ മാലാഖ എന്ന ചിത്രത്തിന് ശേഷം നിസാം ബഷീര്‍ സംവിധാനം ചെയ്യുന്ന ചിത്രത്തില്‍ ആസിഫ് അലി അതിഥി വേഷത്തിലെത്തും
ഷറഫുദ്ദീന്‍, ജഗദീഷ്, ഗ്രേസ് ആന്റണി, ബിന്ദു പണിക്കര്‍ തുടങ്ങിയവരാണ് മറ്റ് പ്രധാന അഭിനേതാക്കള്‍. ദുല്‍ഖര്‍ സല്‍മാന്റെ കുറുപ്പിന് ശേഷം നിമിഷ് രവി ഛായാഗ്രഹണം നിര്‍വ്വഹിക്കുന്ന ചിത്രം കൂടിയാണ് റോഷാക്ക് . ചിത്രം ഓണത്തിന് തീയേറ്റുകളിലെത്തുമെന്നാണ് സൂചന
