ഹിഷാമിന്റെ "ടട്ട ടട്ടര"; മലയാളത്തിൽ അരങ്ങേറ്റം കുറിക്കാൻ അനിരുദ്ധ്

‌തമിഴകത്തിന്റെ സ്വന്തം ​ഗായകനും സംഗീതസംവിധായകനുമായ അനിരുദ്ധ് രവിചന്ദർ മലയാളത്തിൽ അരങ്ങേറ്റം കുറിക്കുന്നു. കല്യാണി പ്രിയദർശനെ കേന്ദ്രകഥാപാത്രമാക്കി നവാഗതനായ മനു സി കുമാർ സംവിധാനം ചെയ്യുന്ന 'ശേഷം മൈക്കിൽ ഫാത്തിമ' എന്ന ചിത്രത്തിന് വേണ്ടിയാണ് അനിരുദ്ധ് ആദ്യമായി മലയാള ഗാനം ആലപിക്കുന്നത്. ഗാനത്തിന്റെ രസകരമായ ടീസറിലൂടെയാണ് അണിയറപ്രവർത്തകർ വിവരം പുറത്തുവിട്ടത്. മെയ് 27ന് ​ഗാനം റിലീസാകും.

ഹിഷാം അബ്ദുൽ വഹാബാണ് ചിത്രത്തിന്റെ സംഗീത സംവിധാനം. സംവിധായകൻ മനു സി കുമാറും ഹിഷാമും ഗാനരചയിതാവ് സുഹൈൽ കോയയും ഒരുമിച്ചിരുന്ന് സംസാരിക്കുന്നതാണ് ​ഗാനത്തിന്റെ ടീസർ വീഡിയോ. ചിത്രത്തിന്റെ ഛായാഗ്രഹണം സന്താന കൃഷ്ണൻ രവിചന്ദ്രൻ ആണ്.

സുധീഷ്, ഫെമിന, സാബുമോൻ, ഷഹീൻ സിദ്ധിഖ്, ഷാജു ശ്രീധർ, മാല പാർവതി, അനീഷ് ജി മേനോൻ, സരസ ബാലുശ്ശേരി, പ്രിയാ ശ്രീജിത്ത്, ബാലതാരങ്ങളായ തെന്നൽ, വാസുദേവ് തുടങ്ങിയവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. ദി റൂട്ട്, പാഷൻ സ്റ്റുഡിയോസ് എന്നിവരുടെ ബാനറിൽ ജഗദീഷ് പളനിസ്വാമിയും സുധൻ സുന്ദരവും ചേർന്നാണ് നിർമാണം.