തുറമുഖം ഒടിടിയിലേക്ക്; റിലീസ് തീയതി പ്രഖ്യാപിച്ചു

നിവിൻ പോളി ചിത്രം തുറമുഖം ഒടിടിയിലേക്ക്. ഏപ്രിൽ 28 മുതൽ സോണി ലിവിൽ സംപ്രേഷണം ആരംഭിക്കും. മാ‍ർച്ച് 10 നായിരുന്നു ചിത്രത്തിന്റെ തീയേറ്റർ റിലീസ്. 1962 വരെ കൊച്ചിയില്‍ നിലനിന്നിരുന്ന ചാപ്പ തൊഴില്‍ വിഭജന സമ്പ്രദായവും അത് അവസാനിപ്പിക്കാന്‍ തൊഴിലാളികള്‍ നടത്തിയ സമരവുമാണ് ചിത്രത്തിന്റെ പ്രമേയം. കെ എം ചിദംബരത്തിന്റെ നാടകത്തെ ആസ്പദമാക്കിയുള്ള ചിത്രത്തിൽ മട്ടാഞ്ചേരി മൊയ്തു എന്ന നായക കഥാപാത്രത്തെയാണ് നിവിൻ പോളി അവതരിപ്പിക്കുന്നത്.

പല കാലഘട്ടങ്ങളിലൂടെ കടന്നുപോകുന്ന ചിത്രത്തിൽ വിവിധ ഗെറ്റപ്പുകളിലാണ് നിവിൻ എത്തിയത്. ലിസ്റ്റിൻ സ്റ്റീഫന്റെ മാജിക് ഫ്രെയിംസാണ് ചിത്രം തീയേറ്ററുകളിലെത്തിച്ചത്. രാജീവ് രവിയാണ് ചിത്രത്തിന്റെ സംവിധാനവും ഛായാഗ്രഹണവും നിർവഹിച്ചിരിക്കുന്നത്. അർജുൻ അശോകൻ പൂർണിമ ഇന്ദ്രജിത്, നിമിഷ സജയൻ, ജോജു ജോർജ്, ഇന്ദ്രജിത് തുടങ്ങിയ വലിയ താരനിര തന്നെ ചിത്രത്തിലുണ്ട്. ഗോപന്‍ ചിദംബരമാണ് ചിത്രത്തിന്റെ തിരക്കഥ. 

2021ൽ റിലീസ് തീരുമാനിച്ചിരുന്ന ചിത്രം കോവിഡിനെ തുടർന്നാണ് ആദ്യം വൈകിയത്. പിന്നീട് മറ്റ് പല പ്രശ്നങ്ങൾ മൂലം റിലീസ് നീണ്ടുപോകുകയായിരുന്നു.