തൃഷ - വിജയ് ജോഡി വീണ്ടും ; ദളപതി 67 ലെ നായികയെ പ്രഖ്യാപിച്ചു
പ്രേക്ഷകർക്ക് ഏറ്റവും പ്രിയപ്പെട്ട ജോഡിയായ വിജയ് യും തൃഷയും വീണ്ടും ഒരുമിക്കുന്നു. ലോകേഷിന്റെ ദളപതി 67 ൽ തൃഷയാണ് നായിക. ഇതുസംബന്ധിച്ച വാർത്തകൾ നേരത്തെയുണ്ടായിരുന്നെങ്കിലും ഔദ്യോഗിക സ്ഥിരീകരണമുണ്ടാകുന്നത് ഇതാദ്യമായാണ്. നിർമ്മാതാക്കളായ സെവൻ സ്ക്രീൻ സ്റ്റുഡിയോസാണ് പുതിയ വിവരങ്ങൾ പങ്കുവച്ചത്.
പ്രിയപ്പെട്ടവർക്കൊപ്പം വീണ്ടും ഒരുമിച്ച് അഭിനയിക്കാനാകുന്നിൽ സന്തോഷമുണ്ടെന്നാണ് താരത്തിന്റെ പ്രതികരണം.
പതിനാല് വർഷത്തിന് ശേഷമാണ് ഹിറ്റ് ജോഡി വീണ്ടും ഒരുമിക്കുന്നത്. 2008 ൽ പുറത്തിറങ്ങിയ കുരുവിയാണ് ഇരുവരും ഒരുമിച്ചെത്തിയ അവസാനചിത്രം. ഗില്ലി എന്ന ചിത്രമാണ് ഇരുവരെയും തമിഴകത്തിന്റെ പ്രിയ ജോഡികളാക്കിയത്. തിരുപ്പാച്ചി , ആദി തുടങ്ങിയ ചിത്രങ്ങളിലും ഇരുവരും ഒരുമിച്ച് അഭിനയിച്ചിരുന്നു
ഇരുവരും ഒരുമിച്ച് അഭിനയിച്ച ചിത്രങ്ങളുടെ ദൃശ്യങ്ങൾ ചേർത്തുള്ള ഒരു വീഡിയോയും നിർമ്മാണ കമ്പനി പങ്കുവച്ചിട്ടുണ്ട്
ചിത്രത്തിന്റെ രണ്ടാം ഷെഡ്യൂൾ കശ്മീരിലാണ്. വിമാനത്താവളത്തിൽ നിൽക്കുന്ന തൃഷയുടെ വീഡിയോയും ട്വിറ്ററിൽ പ്രചരിച്ചിരുന്നു .വാരിസിനും മാസ്റ്ററിനും ശേഷം സെവൻ സ്ക്രീൻ സ്റ്റുഡിയോസ് നിർമ്മിക്കുന്ന ചിത്രമാണ് ദളപതി67
