'ലിയോ' നാളെ മുതൽ ബിഗ് സ്ക്രീനിലേക്ക് ; ആവേശത്തിൽ ആരാധകർ
ലോകേഷ് കനകരാജ് - വിജയ് ചിത്രം ലിയോയുടെ ടൈറ്റില്‍ ടീസര്‍ തീയേറ്ററുകളിലേക്ക്. ധനുഷിന്റെ 'വാത്തി'ക്കിടെ ടീസര്‍ പ്രദര്‍ശിപ്പിക്കുമെന്ന് നിർമാതാക്കള്‍ അറിയിച്ചു. ലിയോയുടെ നിർമാതാക്കളായ സെവൻ സ്ക്രീൻ സ്റ്റുഡിയോസ് തന്നെയാണ് വാത്തിയുടെയും നിർമാണം.
യൂട്യൂബിൽ റിലീസ് ചെയ്ത ലിയോയുടെ പ്രോമോ വീഡിയോ പ്രേക്ഷകർ ആവേശത്തോടെയാണ് സ്വീകരിച്ചത്. 12 ദിവസം കൊണ്ട് 44 മില്യൺ പേരാണ് പ്രൊമോ വീഡിയോ യൂട്യൂബിൽ കണ്ടത്
നാളെയാണ് വാത്തി റിലീസ്. ഇതോടെ ആരാധകർക്ക് ലിയോയുടെ ടീസർ ബിഗ് സ്ക്രീനിലും കാണാനാകും . ഒക്ടോബർ പത്തൊമ്പതിന് ലിയോ തീയേറ്ററുകളിലെത്തും. വിജയ് നായകനാകുന്ന ചിത്രത്തില്‍ തൃഷയാണ് നായിക. ബോളിവുഡ് താരം സഞ്ജയ് ദത്തും തെന്നിന്ത്യൻ താരം പ്രിയ ആനന്ദും മൻസൂർ അലിഖാനും, അർജ്ജുൻ സർജയും ഉള്‍പ്പെടെ വമ്പൻ താരനിരയാണ് ചിത്രത്തില്‍ അണിനിരക്കുന്നത്. ജനുവരി 2 നാണ് ചിത്രത്തിന്റെ ചിത്രീകരണം ആരംഭിച്ചത്. കശ്മീരില്‍ ഷൂട്ടിങ് പുരോഗമിക്കുന്നതിനിടെയുള്ള ചിത്രങ്ങള്‍ ലോകേഷ് അടുത്തിടെ പങ്കുവെച്ചിരുന്നു.
തമിഴ്, തെലുങ്ക്, കന്നഡ, ഹിന്ദി എന്നീ ഭാഷകളിലാണ് ലിയോ റിലീസിനെത്തുക. 14 വർഷത്തിന് ശേഷം ദളപതിയും തൃഷയും ഒരുമിക്കുന്ന ചിത്രം കൂടിയാണിത്. ചിത്രത്തിന്റെ ഡിജിറ്റല്‍ പകര്‍പ്പവകാശം നെറ്റ്ഫ്‌ളിക്‌സ് ഇതിനോടകം സ്വന്തമാക്കിയിട്ടുണ്ട്
