'അത് അണ്ണയ്യയാണ്, അണ്ണയ്യയാണ് എന്ന് പറഞ്ഞപ്പോഴാണ് എനിക്ക് മനസ്സിലായത് എന്റെ ഭര്‍ത്താവ് പോയെന്ന്.' മൂന്ന് വര്‍ഷങ്ങള്‍ക്ക് മുമ്പാണ് യശോദയ്ക്ക് ഭര്‍ത്താവ് അണ്ണയ്യനെ നഷ്ടമാവുന്നത്. 2019 ഓഗസ്റ്റ് എട്ടിന് പുത്തുമലയില്‍ ഉരുള്‍ പൊട്ടിയപ്പോള്‍ മലവെള്ളത്തില്‍ ഒലിച്ച് പോയതാണ് അണ്ണയ്യ. ദുരന്തത്തില്‍ മരിച്ചു എന്നറിയാം എന്നല്ലാതെ അണ്ണയ്യയുടെ മൃതദേഹം പോലും യശോദയ്ക്ക് കിട്ടിയില്ല. ഭര്‍ത്താവിന്റെ ജീവനെടുത്ത ദുരന്ത ഭൂമിയിലേക്ക് മൂന്ന് വര്‍ഷത്തിനിടെ ഒരിക്കല്‍ പോലും യശോദ പോയിട്ടുമില്ല.
ഹാരിസണ്‍ മലയാളം എസ്‌റ്റേറ്റിലെ തൊഴിലാളിയായിരുന്നു കര്‍ണാടക സ്വദേശിയായ അണ്ണയ്യ. എസ്റ്റേറ്റ് തൊഴിലാളികള്‍ക്ക് നല്‍കിയിരുന്ന പാടിയില്‍ ഇന്ന് യശോദ ഒറ്റയ്ക്കാണ്. മഴയത്ത് മലയില്‍ ജീവിക്കുന്നതിന്റെ ഭീതിയില്‍ പാടികളിലുണ്ടായിരുന്നവരെല്ലാം മറ്റിടങ്ങളിലേക്ക് താമസം മാറ്റി. അണ്ണയ്യയുടെ മരണ ശേഷം തേയില കമ്പനി മകന് ജോലി വാഗ്ദാനം ചെയ്തിരുന്നുവെങ്കിലും അക്കാര്യത്തില്‍ ഇനിയും തീരുമാനമായിട്ടുമില്ല.
