അറുപത്തിമൂന്നിന്റെ പ്രസരിപ്പിൽ പഠനം തുടരാൻ ചന്ദ്രൻ
മക്കളും പേരക്കുട്ടികളുമൊക്കെയായി കഴിയുമ്പോഴും പഠിക്കാനുള്ള അടങ്ങാത്ത ആഗ്രഹമാണ് കാഞ്ഞങ്ങാട് സ്വദേശി ചന്ദ്രനെ ലോ കോളേജിൽ എത്തിച്ചത് . പ്രവേശന പരീക്ഷയിൽ ഉയർന്ന മാർക്ക് നേടിയാണ് പ്രവേശനം.
ജീവിത പ്രയാസങ്ങള്‍ക്ക് നടുവില്‍ 19-ാം വയസ്സില്‍ ടെലിഫോണ്‍ ഓപ്പറേറ്ററായി ജോലിക്ക് കയറിയതാണ് ചന്ദ്രേട്ടന്‍. പയ്യന്നൂര്‍ കോളേജില്‍ ബി എസ് സി ഫിസിക്‌സ് രണ്ടാം വര്‍ഷം ഡിഗ്രി പൂര്‍ത്തിയാക്കാനാവാതെയാണ് കേന്ദ്ര സര്‍വീസില്‍ ജോലിക്ക് കയറിയത്. വിരമിക്കുമ്പോള്‍ ബി.എസ്.എന്‍.എല്‍ ഓഫീസില്‍ സബ് ഡിവിഷണല്‍ ഓഫീസറായിരുന്നു. അതിനുശേഷം കണ്ണൂര്‍ യൂണിവേഴ്‌സിറ്റിയില്‍ നിന്നും നല്ല മാര്‍ക്കോടെ പൊളിറ്റിക്കല്‍ സയന്‍സില്‍ ബരുദം നേടിയതിന് ശേഷമാണ് കോഴിക്കോട് ഗവണ്‍മെന്റ് ലോ കോളേജില്‍ ചന്ദ്രേട്ടനെത്തിയത്.
2003 ല്‍ കോളേജില്‍ നിന്ന് പഠനം പൂര്‍ത്തിയാക്കിയ ബന്ധുകൂടെയായ അഡ്വ: പി.എം ആതിരയാണ് ചന്ദ്രേട്ടന്റെ ഗാര്‍ഡിയനായി കൂടെ ക്യാമ്പസ്സിലെത്തിയത്. സര്‍വീസില്‍ നിന്ന് വിരമിച്ചവര്‍ ക്യാമ്പസ്സില്‍ പഠിക്കാനെത്തുന്നുണ്ടെന്നും ഇത് സന്തോഷകരമായ കാര്യമാണെന്ന് പ്രിന്‍സിപ്പല്‍ ഡോ. എന്‍ കൃഷ്ണകുമാര്‍ പറഞ്ഞു. ഈ വര്‍ഷം ക്യാമ്പസ്സിലെത്തിയ ഏറ്റവും പ്രായംകൂടിയ വ്യക്തിയാണ് ചന്ദ്രന്‍
