അഭിമുഖം|'യുകെയിലെ കുടിയേറ്റ നിയമങ്ങൾ പി ആർ തേടിപ്പോകുന്ന ഇന്ത്യന്‍ വിദ്യാർഥികൾക്ക് തിരിച്ചടി:' ഡോ. ജിനു സക്കറിയ ഉമ്മന്‍

നൈപുണ്യ തൊഴിലാളികൾക്കുള്ള (സ്‌കിൽഡ് വർക്കേഴ്സ്) വിസ ഒരു കമ്പനി കൊടുക്കണമെങ്കിൽ ഏറ്റവും കുറഞ്ഞത് 38,700 പൗണ്ട് ശമ്പളം ഉണ്ടായിരിക്കണമെന്നാണ് പുതിയ നിയമം നിഷ്കർഷിക്കുന്നത്. നേരത്തെ 26,000 പൗണ്ട് മതിയായിരുന്നു. കാനഡ പോലെ പോയിന്റിനെ അടിസ്ഥാനമാക്കിയായിരുന്നു യുകെയിലെ ഇതുവരെയുള്ള വിസ സംവിധാനം. പല മാനദണ്ഡങ്ങളുടെ അടിസ്ഥാനത്തിലാണ് പോയിന്റ് ലഭിക്കുക. നിശ്ചിത പോയിന്റ് ഉണ്ടെങ്കിൽ മാത്രമേ വിസ ലഭിക്കൂ. എന്നാൽ നിലവിലെ നിയമം ഈ സംവിധാനത്തെ മുഴുവൻ തകിടം മറിച്ചിരിക്കുകയാണ്‌. ഇനിമുതൽ നിശ്ചിത ശമ്പളം ഇല്ലാതെ എത്ര പോയിന്റ് കിട്ടിയാലും യുകെയിലേക്ക് കടക്കാൻ ആർക്കും സാധിക്കില്ല. അതാണ് ഒന്നാമത്തെ പ്രശ്നം. രണ്ടാമതായി, യുകെയിലേക്ക് കുടിയേറുന്ന ഒരാൾക്ക് കുടുംബത്തെയോ ജീവിതപങ്കാളിയെയോ കൂടെ കൊണ്ടുപോകണമെങ്കിൽ നേരത്തെ 18,600 പൗണ്ടിന്റെ വരുമാനം മതിയായിരുന്നു. അതുമിപ്പോൾ 38,700 പൗണ്ടായി വർധിപ്പിച്ചിരിക്കുകയാണ്.

ബ്രെക്സിറ്റിന്റെയും പോസ്റ്റ് കോവിഡിന്റേയും പശ്ചാത്തലത്തിൽ കൂടിയാണ് നമ്മൾ കാര്യങ്ങളെ കാണേണ്ടത്. നേരത്തെ യൂറോപ്യൻ യൂണിയൻ രാജ്യങ്ങളിലുള്ള ആളുകൾക്ക് വളരെ സ്വതന്ത്രമായി ബ്രിട്ടനിലേക്കും മറ്റ് യൂറോപ്യൻ രാജ്യങ്ങളിലേക്കും സഞ്ചരിക്കാമായിരുന്നു. എന്നാൽ ബ്രെക്സിറ്റിന് ശേഷം നിരവധി നിയന്ത്രണങ്ങൾ വന്നു. 2022-ൽ ഇയുവിൽനിന്ന് കുടിയേറിയ 86,000 പേരാണ് ബ്രിട്ടൻ വിട്ടത്. അതേസമയം, ഇയു ഇതര രാജ്യങ്ങളിൽനിന്ന് ഏഴര ലക്ഷത്തോളം ആളുകൾ കുടിയേറുകയും ചെയ്തു. സാധാരണഗതിയിൽ തന്നെ കുടിയേറ്റവിരുദ്ധരാണ് കൺസർവേറ്റിവ് പാർട്ടികൾ . എന്നാൽ ഇതേ സമയം തന്നെ യൂറോപ്പ് ഇതര രാജ്യങ്ങളിൽ നിന്ന് വന്നവർ ബ്രിട്ടനിലെ ജോലി സാധ്യതകൾ കയ്യടക്കുകയും ചെയ്യുന്നുണ്ട്. തിരഞ്ഞെടുപ്പുകൂടി മുന്നിൽ നിൽക്കുന്നതിനാൽ കുടിയേറ്റത്തിന്റെ തോത് എങ്ങനെയെങ്കിലും കുറയ്ക്കാനാണ് വലതുപക്ഷ പാർട്ടി ലക്ഷ്യമിടുന്നത്.

യുകെയിലെ തദ്ദേശീയ ജനവിഭാഗം ചെയ്യാൻ താത്പര്യപ്പെടാത്ത ജോലികളടങ്ങിയ 'ഷോർട്ടേജ് ഒക്കുപ്പേഷൻ ലിസ്റ്റ്' എന്നൊരു പട്ടികയുണ്ട്. ആരോഗ്യമേഖലയും വിദ്യാഭ്യാസ രംഗവുമാണ് ഈ പട്ടികയിൽ പ്രധാനമായുമുള്ളത്. ഈ പട്ടികയിലുള്ള നഴ്സുമാർ, കെയർ ഗിവർമാർ എന്നിങ്ങനെയുള്ള ജോലികൾക്കാണ് നമ്മുടെ നാട്ടിലെ അധികം പേരും പോകുന്നത്. നൈപുണ്യ തൊഴിലുകളുടെ പട്ടികയിലാണ് നഴ്‌സുമാരെങ്കിലും പുതിയ നിയമപ്രകാരം അവർക്ക് 38700 പൗണ്ട് ശമ്പളമില്ലെങ്കിലും പ്രശ്നമില്ല. അവരെ ഒഴിവാക്കിയിട്ടുണ്ട്. എന്നാൽ കെയർ ഗിവർമാർക്ക് നിയമം ബാധകമാണ്. ഇവർക്ക് കുറഞ്ഞ ശമ്പള പരിധി ഇല്ലെങ്കിൽ കുടുംബത്തെ കൊണ്ടുപോകാൻ സാധിക്കില്ല.

കുടിയേറ്റവിരുദ്ധത എന്നതാണ് കൺസേർവേറ്റിവ് പാർട്ടിയുടെ മുദ്രാവാക്യം. കുടിയേറ്റക്കാർ യുകെയിലെ സംസ്കാരത്തെ നശിപ്പിക്കുന്നു എന്നൊക്കെ ഇക്കൂട്ടർ വാദിക്കുന്നുണ്ട്. അതുകൂടാതെ രാജ്യത്തെ ഫുഡ് ബാങ്ക് പോലുള്ള 'അവശ്യ സേവനങ്ങൾ' യുകെയിലെ ജനങ്ങൾക്ക് വേണ്ടി മാത്രമുള്ള ക്ഷേമ സംവിധാനങ്ങളാണ് എന്നാണ് കൺസർവേറ്റിവുകളും അവരെ പിന്തുണയ്ക്കുന്ന ജനങ്ങളും കരുതുന്നത്. എന്നാൽ ഇതെല്ലാം വിദേശത്തുനിന്ന് എത്തുന്ന വിദ്യാർഥികൾ ഉപയോഗിക്കുന്നുണ്ടെന്നും തങ്ങൾക്ക് ലഭിക്കേണ്ട ആനുകൂല്യങ്ങളിൽ അവർ കൈയിടുന്നു എന്നും ആക്ഷേപങ്ങളുണ്ട്. കൂടാതെ തിരഞ്ഞെടുപ്പ് മുന്നിൽ കണ്ടുകൊണ്ട് കൂടിയാണ് ഈ നീക്കം. എന്നാൽ തിരഞ്ഞെടുപ്പ് കഴിഞ്ഞാൽ ചിലപ്പോൾ കാര്യങ്ങൾ മാറിയേക്കാം.

വിദ്യാർഥികൾ വന്നിട്ട് കോഴ്സ് പൂർത്തിയാക്കാതെ കെയർ ഗിവർ വിസയിലേക്ക് മാറുന്ന ഒരു സാഹചര്യമുണ്ട്. കെയർ വിസയിലേക്ക് മാറ്റുക എന്നത് കച്ചവടമായും മാറിയിട്ടുണ്ട്. വിദേശത്തുനിന്ന് എത്തുന്നവരാണ് ആ കച്ചവടം നടത്തുന്നത്. അതുകൊണ്ടുതന്നെ ഇനി കോഴ്സ് പൂർത്തിയാക്കാതെ വിസ മാറ്റാൻ കഴിയില്ലെന്ന് ഒരു നിയമം മൂന്നുമാസം മുൻപ് യുകെ സർക്കാർ കൊണ്ടുവന്നിരുന്നു. അതിനു പിന്നാലെയാണ് പുതിയ നിയമങ്ങൾ.

നാട്ടിലെ റിക്രൂട്ട്മെന്റ് ഏജൻസികൾ പറയുന്ന പണം കൊണ്ടൊന്നും അവിടെ കഴിയാൻ പലപ്പോഴും കഴിയാറില്ല. ഒരു വീട് വാടകയ്ക്ക് കൊടുക്കണമെങ്കിൽ പോലും യു കെയിൽ ഒരു സ്റ്റാൻഡേർഡ് ഉണ്ട്. ഒരുപാട് പേർക്കൊന്നും ഒരുമിച്ച് നിൽക്കാൻ കഴിയില്ല. അങ്ങനെ വരുമ്പോൾ ചെലവ് വർധിക്കും. അതുവലിയ വിഷയമാണ് ഉണ്ടാക്കുന്നത്.

38,700 പൗണ്ട് ശമ്പളമില്ല എന്ന് പറഞ്ഞുകൊണ്ട് ആരെയും ഉടനടി ആരെയും പുറത്താക്കില്ല. ഇതിനെ സംബന്ധിക്കുന്ന കൃത്യമായ പ്രസ്താവനയും പുറത്തുവന്നിട്ടുണ്ട്. അതുപ്രകാരം, നിയമം പ്രാബല്യത്തിൽ വരുന്ന ജനുവരിക്ക് ശേഷം വിസ പുതുക്കാൻ പോകുമ്പോൾ ഈ പറയുന്ന ഉപാധി പാലിക്കുന്നില്ലെങ്കിൽ പങ്കാളികൾ തിരികെ പോകേണ്ടി വരും.