'പ്രതീക്ഷയ്ക്കൊത്ത് ഉയരാനായില്ല'; തോല്‍വി സമ്മതിച്ച് ബസവരാജ് ബൊമ്മെ
കര്‍ണാടക നിയമസഭാ തിരഞ്ഞെടുപ്പില്‍ പരാജയം സമ്മതിച്ച് മുഖ്യമന്ത്രി ബസവരാജ് ബൊമ്മെ. പ്രതീക്ഷിച്ച വിജയം നേടാന്‍ ബിജെപിക്ക് സാധിച്ചില്ലെന്ന് ബൊമ്മെ വ്യക്തമാക്കി. ഫലം വന്നശേഷം വിശദമായ വിശകലനത്തിലേക്ക് പാര്‍ട്ടി കടക്കുമെന്നും അദ്ദേഹം പറഞ്ഞു.
" ഫലം പൂര്‍ണമായി വന്നതിന് ശേഷം പാര്‍ട്ടി വിശകലനം ചെയ്യും. ഒരു ദേശീയ പാർട്ടി എന്ന നിലയിൽ, വിവിധ തലങ്ങളിൽ എന്തെല്ലാം പോരായ്മകളും വിടവുകളും അവശേഷിപ്പിച്ചുവെന്ന് വിശകലനം ചെയ്യും. ഒപ്പം അത് മനസിലാക്കി തിരുത്തലുകള്‍ കൊണ്ടുവരും. ഈ തിരഞ്ഞെടുപ്പ് ഫലം ഭാവിയിൽ മുന്നേറാനുള്ള പ്രചോദനമായി കാണുന്നു," ബൊമ്മെ പറഞ്ഞു.
കര്‍ണാടകയില്‍ തുടര്‍ഭരണം ഉറപ്പാണെന്നായിരുന്നു വോട്ടെണ്ണലിന്റെ തുടക്കത്തില്‍ ബൊമ്മെയുടെ പ്രതികരണം. കേവലഭൂരിപക്ഷത്തിനുള്ള മാജിക് നമ്പര്‍ ബിജെപി ഒറ്റയ്ക്ക് സ്വന്തമാക്കുമെന്നും ബൊമ്മെ പറഞ്ഞിരുന്നു.
തിരഞ്ഞെടുപ്പ് ഫലത്തെ അംഗീകരിക്കുന്നുവെന്ന് ബി എസ് യെദ്യുരപ്പയും പറഞ്ഞു. ''ജയവും തോല്‍വിയും ബിജെപിക്ക് പുതിയ കാര്യമല്ല. വിധി പരിശോധിക്കും. തെരഞ്ഞെടുപ്പ് വിധിയില്‍ പ്രവര്‍ത്തകര്‍ പരിഭ്രാന്തരാകേണ്ടതില്ല'' - യെദ്യുരപ്പ വ്യക്തമാക്കി.
