തമിഴ്‌നാട്ടിൽ ജാതി അടയാളങ്ങളുള്ള 80 തെരുവുകളുടെ പേരുമാറ്റി; 33 ഗ്രാമപഞ്ചായത്തുകൾ പ്രമേയം പാസാക്കി
തമിഴ്‌നാട്ടിലെ തൂത്തുക്കുടി ജില്ലയിൽ ജാതി അടയാളങ്ങളുള്ള 80 തെരുവുകളുടെ പേരുമാറ്റാൻ 33 ഗ്രാമപഞ്ചായത്തുകൾ ചേർന്ന് തീരുമാനിച്ചു. ഗാന്ധി ജയന്തി ദിവസം നടന്ന ഗ്രാമസഭയിലാണ് തീരുമാനം. സമൂഹത്തെ ജാതിചിന്തയിൽ നിന്ന് പുറത്തെത്തിക്കാൻ ജാതിപ്പേരുൾപ്പെടുന്ന തെരുവുകളുടെ പേര് മാറ്റണം എന്ന് ജില്ലാ കളക്ടർ ഡോ കെ സെന്തിൽരാജ് ഗ്രാമപഞ്ചായത്തുകളോടും മറ്റ് തദ്ദേശ സ്ഥാപനങ്ങളോടും ആവശ്യപ്പെട്ടിരുന്നു. ജാതിപ്പേരുകൾ മാറ്റി സ്വാതന്ത്രസമര സേനാനികളുടെയോ, ശാസ്ത്രജ്ഞരുടെയോ, തമിഴ് ചിന്തകരുടെയോ പേരുകൾ നൽകണം എന്നായിരുന്നു കളക്ടറുടെ നിർദ്ദേശം.
തൂത്തുക്കുടി ജില്ലയിലെ 33 പഞ്ചായത്തുകളടങ്ങുന്ന 9 പഞ്ചായത്ത് യൂണിയനുകൾ ചേർന്നാണ് ജാതിപ്പേരുകളൊഴിവാക്കി 80 തെരുവുകൾക്ക് പേരിടാം എന്ന പ്രമേയം പാസ്സാക്കിയത്. റവന്യു രേഖകളിലും ഗസറ്റിലും മാറ്റങ്ങൾ വരുത്തുന്നതിന് പ്രമേയം സർക്കാരിനയക്കും. മാറ്റങ്ങൾ വരുത്തിക്കഴിഞ്ഞാൽ ഇവിടങ്ങളിലുള്ളവരുടെ ആധാർ, വോട്ടർ ഐഡി, ഡ്രൈവിംഗ് ലൈസൻസ് ഉൾപ്പെടെയുള്ളവയിൽ മാറ്റം വരുത്തേണ്ടി വരും.
ജാതിപ്പേരുൾപ്പെടുന്ന സ്ഥലനാമങ്ങൾ ആളുകളിൽ ജാതി ചിന്ത ഊട്ടിയുറപ്പിക്കുമെന്നും, അത് പിന്നീട് വിവേചനങ്ങളിലേക്ക് നയിക്കുമെന്നും ജില്ലാ കളക്ടർ ഡോ സെന്തിൽരാജ് പറഞ്ഞു. ജില്ലയിൽ ജാതി അടയാളങ്ങൾ ഇല്ലാതാക്കാനും ആളുകൾക്കിടയിൽ സാഹോദര്യം നിലനിർത്താനും പോലീസ് ഉൾപ്പെടെയുള്ള വകുപ്പുകളായി ചേർന്ന് പുതിയ പദ്ധതികൾ ആവിഷ്കരിക്കുന്നുണ്ടെന്നും കളക്ടർ അറിയിച്ചു.
